去年虎年運輸署新春幸運車牌拍賣，有個不知名男士豪擲740萬元同700萬元，總共以1,440萬元天價奪得無字頭13號同26號車牌，「實生」同「易撈」分別成為歷來第4位同第6位最貴車牌。豪客投得車牌後玩神秘，一直唔將兩個車牌轉名，似乎想隱藏身份。
呂辛係貨倉大王
事隔一年，直至近日轉名限期屆滿前終於轉名，天價車牌主人身份曝光，據登記資料，兩個車牌登記嘅公司應屬城中低調超級富豪呂辛所有。呂辛現年91歲，係本地貨倉大王，旗下上市公司安全貨倉主力做倉存同物流，市值逾8億元。
呂辛家底當然唔只呢個數目，因為其生意王國遍及財務同地產，在日本同東南亞都有生意，曾斥資20億元在廣東建廠，去年申請將旗下貨倉改建住宅，業務發展惹人憧憬。呂辛係真正低調富豪，悶聲發大財亦發財立品，名下基金會歷年來捐款慈善、教育、醫療以億元計。
今年新春幸運車牌拍賣本月20日舉行，其中無字頭16號估計最搶手，隨時以幾百萬元成交，其他幾個無字頭車牌668、6668同8222等，相信都會賣得好價。