真人不露相，江湖上行走之最高層次。露相非真人，古有明訓。若然自己冇料，仲夾硬扮晒代表，旁人看來，真是瘀到爆。以這樣一個窩囊廢人物做主角，齣戲點會好睇。莫講話薛夫洛根毫無魅力可言，就算找佐治古尼或湯告魯斯來演，都未必可以起死回生。薛夫還要擔起大量對白戲，不但未能妙語連珠，反而只覺其嘮嘮叨叨，廢話連篇。
坦白說，當年的《青蜂俠》電視片集，我只看過一兩集。但不久前看過李小龍為爭取角色而做的試鏡片段，超正！李小龍英語流利，充滿自信。今次由周杰倫演加藤一角，英語普通，而武功方面，顯然不及他設計的現代戰車那麼吸引，但起碼角色討好。本片劇情人物和時代細節各方面，真的熟口熟面，毫無新意。
還好，潮流興3D，尤其荷李活，甚麼題材都嘗試用3D來包裝！以我所看的一場3D《青蜂俠》，3D的弊端顯露無遺，畫面灰暗，反差不足（光位不光，暗位不夠黑）。動作場面以傳統的短促鏡頭和急遽剪接呈現，更凸顯了3D的無所作為。我相信同一影片的3DIMAX貴價版好不到那裏，之前3D《創．戰紀》給我的信心又再喪失殆盡。我以後都係睇番菲林版本算嘞。
撰文：黃國兆