講起春茗，美聯（1200）今年都有新搞作。高級執行董事黃錦康同經絡按揭轉介副總裁馮君培，喺食飯前先嚟表演太極推手，由於要留多啲位畀佢哋表演飛彈動作，喺一間啱啱夠企幾十人嘅房入面，五、六十個傳媒要企得非常親密，大家睇到大汗叠細汗，氣氛夠晒熱鬧！
黃錦康話，自己嘅一身造型係扮緊小熊維尼（圖右），馮君培就扮演牛魔王（圖左），演繹嘅太極推手，寓意樓市經常性嘅牛熊角力！佢哋推吓推吓，忽然馮君培被小熊嘅氣勢推到向後飛彈。黃錦康話，呢幾吓動作係想話畀大家知，樓市牛市幾時會飛起、幾時會變熊市等等，只要細心睇就睇到……咁家樓市係牛市定熊市呀？佢話雖然熊市迹象增加（好似內地加息，同埋港府話增加樓市供應咁），但就仲係牛市囉！