工聯會會長鄭耀棠受頸椎病困擾多時，久無公開露面，噚日佢出席工聯會團拜，身形瘦咗一圈。原來佢兩個月內驟減20磅，事關病情嚴重令佢寢食不安，佢同八方講，最辛苦嘅時候，連揸筷子夾餸或者擦牙都冇力，有人誤以為佢中風甚至患癌，幸好近幾個月經中醫治療後逐漸好轉，但仍然未完全康復。
棠哥交遊廣闊，老友知佢抱恙，紛紛介紹名醫、神醫畀佢，佢笑稱醫生名單甚長，睇十年都未睇得晒。有醫生建議做頸椎手術，不過佢十五十六，事關一位朋友做完同類手術後下半身竟然癱瘓，風險咁高，所以佢唔敢貿然開刀。
由於未知幾時康復，棠哥要繼續向煲呔請假，短期內要缺席行會，甚至連北京兩會都要缺席。