過年開開心心,不過使錢好似倒水咁,係時候諗吓慳錢大法,換架新車都係一個唔錯選擇!乜話?要慳錢竟然換新車?呢架當然唔係一般私家車,係三菱電動環保車i-MiEV,究竟點慳法?過年揸車來個低碳拜年零使費,咁夠慳未!
記者:趙慧敏
攝影:伍慶泉
Model:Lo、Cherry@PureModels
認清充電停車場
經過幾日行程,除了過隧道嘅收費之外,基本上叉完電再行車,兼有免費泊車,好抵呢!但是除慳家外,車的實用性一樣重要!雖然i-MiEV只屬四座私家車,寬敞的內櫳確是其優勢,對象亦是行駛短路程的家庭,但如果載一家大細四圍去,只要清楚知道邊度有充電停車場,其實四圍去也絕對沒有問題的!
電都唔使錢
就算平日係假期司機,新年期間用車機會總係多好多,由年初一至年初十,都會周圍走去親朋戚友屋企拜年,有時油費同停車場泊車費真係幾襟計!不過今年終於有架公開發售嘅電動車i-MiEV,就喺今個農曆新年借用五日四夜,睇吓有幾慳家!作為一般司機,發覺除汽車廢氣排放量外,最環保嘅莫過於慳錢,揸住這部i-MiEV,居然連電費及停車場費都可以慳番,認真Perfect!
慳家法一:荷里活廣場 買禮盒
去拜年當然唔可以得兩梳蕉,點都要買份禮盒先夠體面,既然揸得電動車,當然唔泊要畀錢嘅咪錶位,幾大都泊商場嘅停車場就更好,可以Shopping之餘,仲有埋免費充電服務,連十零蚊電費都可以慳番,當中鑽石山荷里活商場絕對係好地點,只要將電動車駛入,可免費充電之餘,仲有埋六小時免費泊車,買齊禮盒嘆番個Tea,時間都綽綽有餘呀!
慳家法二:領匯7停車場 拜年祈福
來到年初九,仍有不少人仍放緊假到親友屋企拜年,拜年前先Check目的地附近有無領匯屬下兼有電動車泊位的停車場,因又可免泊車費兼免費充電!不得不讚的,是日前將電動車駛入領匯停車場,服務確一流,一駛入車位,職員已第一時間搶先招呼,介紹充電用法,免泊程序亦極簡單,職員登記入閘時使用的八達通號碼,出閘時便可獲豁免收費。如去黃大仙祠祈福一樣慳番,將電動車泊喺龍翔廣場的領匯停車場,再去黃大仙祠,一蚊都唔使畀!
領匯網址: http://www.thelinkreit.com/tc/parking/park.asp
i-MiEV規格
引擎:電動馬達330V鋰電池
馬力:64ps/3,000-6,000rpm
扭力:18.4kg-m/0-2,000rpm
傳動:CVT無段變速後驅
售價:$395,000
查詢:寰宇汽車(27211111)