新正頭拜年，上人屋企陪細蚊仔捉馬騮、踢足球，但呢種和諧感覺係咪真正嘅我？No囉！天生爆頭王應該只屬於殺戮戰場，不留餘地先係我嘅性格，所以今個月尾，我要喺《殺戮地帶3》復出！22號派貨，過咗初十啦阿媽！
文：阿洛
Move當手掣 爆頭恰o靚仔
新《Killzone3》除聲畫更上一層樓，最正係加入3D立體顯示，有3D電視嘅機迷，除咗《GT5》外又多隻Game同朋友過招。今集亦新增多人連線，及單機分割畫面協力對戰；但最正都係支援Move，動態控制器化身狙擊槍，玩法絕對勁過齋手掣！網戰朋友突然勁咗？唔使問點解，答案係人哋有錢囉！
鬼鬼祟祟 埋身舂人
故事承接《殺戮地帶2》，講述特種部隊ISA繼續孤軍作戰，對抗軍國主義赫爾蓋斯特。角色方面，除識咗好耐嘅Sev、Rico、Narville外，仲有新女Jammer加盟；武器照例強勁之餘，今集會更着重近身戰鬥，潛近敵人、就用拳腳將人擊暈，對於槍法唔準，而又EQ低嘅玩家，爽快感會倍增！另外《殺戮地帶3》會同步推出中英文合版，明個故事講乜，自然更投入。
要威就要買頭盔
作為大作，推出乜版、物版係例行公事，初回限定全部都係鐵盒版Killzone3SteelBookEdition同綑組，除遊戲外，仲有PSN特典下載序號，地圖、主題、音樂等大把嘢下載。
而最犀利嘅就係限量收藏版Killzone3HelghastEdition，會有成個頭咁大嘅赫爾蓋斯特頭盔複製品、畫冊、同PSN所有下載內容，而且仲會有隻半隱形效果嘅赫爾蓋斯特槍手公仔！
《Killzone3》
主機：PS3
種類：FPS
廠商：GuerrillaGames
人數：多人
推出日期：2月22日
