新年假期，好多朋友紛紛外遊，一位經紀就組成旅行團去拉斯維加斯，佢話平過去澳門喎。點解會咁，皆因拉斯維加斯一貫送埋酒店房間畀香港豪客，自金融海嘯後，美國人節衣縮食，少去維加斯玩樂，奧巴馬總統不止一次指責大公司到維加斯開會，浪費金錢，大公司為咗公關形象，暫停不少到維加斯嘅獎勵旅遊計劃，令維加斯啲MICE生意大跌，酒店房間橫掂空置，在農曆年期間，索性向亞洲豪客大贈送。經紀X佢地就攞到幾間酒店嘅豪華套房，全部免費，於是成班人一齊過去玩餐飽，至於會唔會在賭場輸大錢，視乎個人賭運啦。經紀X話在維加斯碰到莎莎郭與大批親友，成個郭氏旅行團咁款，人地玩得唔知幾高興，莎莎郭近年行運，上市公司盈利增長可觀，馬場贏馬不停，單係一隻「締造美麗」，在十二月贏國泰航空香港一里錦標，一月贏董事盃，兩場共得獎金逾一千五百萬元，莎莎郭自己都話夠運過肥年，去維加斯過年，點玩都得啦。
經紀X講維加斯嘅賭運就麻麻嘞，自澳門擴充，新加坡開賭之後，維加斯嘅賭場收益就停滯不前，市面不景，失業率高企，房地產價格大跌，銀行收樓（foreclosure）數目稱冠美國，成個內華達州氣氛低迷，維加斯就強顏歡笑，與澳門之煙花繁華，相距甚大。
澳門真係好掂喎，二○一一年一月份賭場收入上升三成三去到一百八十五億七千萬澳門幣，全年增長率高達五成八，可謂驚人，最大賭場（以收入計）就係何鴻燊嘅澳博，佔三成份額，一間澳博已經等於成條維加斯大街（LasVegasStrip）。何鴻燊以前係澳門賭王，現在就係世界賭王，邊個控制澳博就可以威震全球賭業。賭王已經八十九歲咯，身體健康係點，大家可在電視畫面觀察，佢嘅股份繼承權，點止值錢咁簡單呀。澳門成為世界賭博之都，要多謝邊個呢？第一係要多謝何厚鏵，夠膽在二○○二年開放賭場，增發賭牌，第二就當然係多謝祖國同胞，十三億人總係有錢輸不盡嘅！