邊有打工仔有長約唔要要短約，哥迪奧拿偏偏就係呢一種人，日前佢同意同巴塞隆拿續約，不過佢居然選擇淨係續約一年。點解會咁？或者佢有好路數啩。
喺今個夏天約滿嘅教練哥迪奧拿喺巴塞教得好開心，除咗因有球隊成績好，仲因佢有100%嘅控制權，同埋全完得到會長同球員嘅信任，所以喺禮拜二亦決定續約，但就只係續約一年至2012年6月。呢位40歲嘅前西班牙國腳中場喺08年6月上任後，幫巴塞贏咗8個大賽錦標，當中包括兩次西甲同埋一次歐聯，被認為球會史上最成功嘅教練，所以會方亦好希望佢可以簽長約，但點都唔掂佢簽賣身契。
若再贏歐聯筍工任佢揀
查實哥迪奧拿之前都係咁，舊年佢選擇同巴塞續約一年，今年亦都係咁，而佢就解釋，逐年逐年咁簽，可以令佢更有爭標動力。家陣佢唔簽長約，萬一俾巴塞炒魷魚嘅話，就唔會攞到好多賠償，但從另一個角度睇，佢冇俾份長約綁住，若然有好路數，可以話走就走。講真，如果佢今年再幫巴塞贏西甲同埋歐聯，到時真係大把筍工送上門，揀去英超接受新挑戰（有指曼聯同車仔都想搵佢）又得，選擇去中東掘金又得（之前傳卡塔爾足總願意畀佢2,000萬歐元年薪），所以話，佢同巴塞逐年簽，擺明係幫自己謀定後路。
巴塞終於「賣心口」
巴塞喺成功游說哥迪奧拿留多一年嘅同時，亦向現實低頭，唔同錢作對。由今年7月開始，佢哋波衫心口個贊助，會轉做每年畀3,000萬歐元嘅QatarFoundation，而UNICEF則由心口去咗後面，擺向球員個名下面。另外，巴塞前會長加斯柏日前就爆響口，話皇家馬德里教練摩連奴喺96年能夠嚟魯營做繙譯，全因當時教練卜比笠臣堅持話要，所以佢哋亦只喺畀摩佬1萬比塞塔（約640港元）嘅月薪；但英雄莫問出處，摩佬家陣係最炙手可熱嘅教練，年薪仲高達1,000萬歐元㖭。