車公批示「威人威威不是威」，外號新界王嘅鄉議局主席劉皇發遵照神靈指示，噚日在鄉議局團拜上唔敢認威，更加認低威，承認自己去年戲言一句「官不聊生」講錯嘢，後來家族成員摩貨炒樓惹來軒然大波，令佢對特區政治生態有更深刻體會。
去年一句戲言講錯
雖然保得住尊貴行會席位，不過發叔未來政途真正「不是威」，甚至凶險滿途，八方收到風，發叔極有可能棄選屯門鄉事委員會主席，至於係咪繼續競選鄉議局主席，機會睇嚟唔細，事關佢噚日以姜太公80歲都做宰相自喻，話自己年僅70幾歲，應該可以繼續貢獻社會，話中隱藏玄機。
發叔話去年指「官不聊生」，其實係半開玩笑性質，旨在為經常被批評嘅官員打打氣，只係估唔到自己都成為眾矢之的，竟然因為公務上嘅疏忽而成為議論對象，佢話吸取教訓之時，亦對香港政治文化同生態有更深層次嘅體會。發叔冇講明「公務疏忽」係咩事，八方相信應該係關於佢家族公司炒賣摩出元朗樓盤件事，佢因為冇申報利益而備受批評。
發叔未表態係咪冧莊競選鄉議局主席，搞到唔少支持者囉囉孿，噚日突然喺團拜酒會上攔途向發叔遞信，讚揚發叔嘅地位同建樹無人能及，希望佢打消退任念頭繼續領導村民。發叔收信後笑笑口話會考慮吓，但強調在目前政治生態中必須明哲保身。
大家唔好以為發叔意興闌珊，因為佢又咁講，「人哋姜太公80歲都做宰相做官啦，我有70幾歲，可以再做貢獻。」姜太公高齡出仕固然出名，但最巴閉係釣魚，發叔自比姜太公，唔通寓意支持者撐佢都係願者上釣？
鄉事會有求變之聲
除咗屯門鄉事委員會，唔少鄉事會改選都有求變之聲，發叔估計最少有10個鄉委會主席會換人。八方聽聞十八鄉鄉事會改選戰況最激烈，現任主席程振明同挑戰佢嘅十八鄉大棠原居民代表梁福元極有可能一票定輸贏。而久未在政界活動露面嘅「食力簡」簡炳墀，盛傳有意挑戰上水鄉事會主席侯志強，據聞有人正從中斡旋，暫時未知鹿死誰手。
mailto:[email protected]