法國球王施丹喺06年世界盃決賽，與意大利後衞馬特拉斯施展經典頭槌報復，不單止領紅牌被逐，法國最終互射12碼輸畀意大利，最後一場比賽充滿遺憾，好多人都認為佢球員生涯「臨尾香」。不過施丹嘅人生，又點止喺球場上；退休4年幾後，周一剛剛獲選有體壇奧斯卡之稱嘅勞倫斯獎，當中嘅終身成就獎，就證明佢冇因為「施丹頭槌」而影響聲譽。
勞倫斯2000年開始頒發終身成就獎，之前已經有3名足球界名宿攞獎，包括首屆獲獎嘅巴西球王比利，當年佢60歲，荷蘭嘅告魯夫同德國嘅碧根鮑華都先後獲獎，攞獎時分別係59同62歲；施丹家先得38歲，而且都未做過教練，攞獎除咗球員時代嘅輝煌成就，包括幫法國贏世界盃同歐國盃，幫皇家馬德里贏歐聯、西甲等錦標外，亦因佢用自己嘅影響力行善積德，佢每年都組織施丹之友隊，同朗拿度牽頭嘅「朗拿度之友」，舉行友賽為聯合國兒童基金籌款，就證明佢愛心無限。
全場觀眾起立鼓掌
當前曼聯名宿卜比查爾頓周一嘅頒獎禮公佈施丹名字一刻，全場觀眾起身拍晒手掌，為呢位法國球王致最高榮譽；大會亦播映佢嘅前隊友碧咸，分享對施丹感受，多次讚揚施丹係天才。而陪施丹出席頒獎禮，除咗係佢愛妻外，仲有佢國家隊隊友杜加里。施丹特別感謝愛妻多年嚟支持，而且坦言一生都唔會離開球壇，仲表示有機會，都想做教練。睇佢嘅地位，皇家馬德里或者法國國家隊，都等緊佢擔正。
西班牙人繼續威
其他大獎方面，西班牙人都繼續威，網球男子「1哥」拿度，就成為最佳男運動員獎，西班牙國家隊贏咗南非世界盃，大熱姿態成為最佳團隊，不過因為佢哋要備戰周三主場對哥倫比亞嘅友賽，教練迪保斯基，同一班球員冇飛去頒獎禮地點阿聯酋杜拜，只透過越洋電視攞獎。
最佳女運動員獎就有少少冷門，美國滑雪好手禾恩憑過去的一年中連贏得滑雪世界盃及奧運會速降金牌，壓過大熱門丹麥網球手禾絲妮雅琪。
2010年勞倫斯獎項部份得主
最佳男運動員獎：拿度（網隊）
最佳女運動員獎：禾恩（滑雪）
最佳團隊獎：西班牙世界盃足球隊（足球）
終身成就獎：施丹（足球）
（）為得獎者所屬運動種類