為實踐一年不幫襯大地產商，龐一鳴扭盡六避開各種連鎖店，他笑言支持者紛紛加入打氣陣營，有樣學樣，惟獨在市區踩單車最惡搞，皆因香港多車路窄，亦不知哪些交通工具機構容許單車駛入，就由他現身說法，話你知香港地踩單車，比坐車更快更型。
記者：蔡俊業
攝影：王文忠、林栢鈞、梁細權
模特兒：Kitterick@PureModels
鳴謝：張俊朗借出StridaBike
靠左靠右都險
龐一鳴以單車代步至今已有4個月，對於家住新界，每天都要坐港鐵回將軍澳的記者來說，以單車代步實在難，而且危險，因為路線並非在單車徑慢慢踏車欣賞風景，而是在車路上與汽車玩頭文字D，「在香港開車路線窄，其實最難係轉線，因為運輸署建議踩單車時靠左線行，但在左線行駛，若汽車要轉左而你要直線走就會好危險！」所以他想出兩個方法應付，其一是在中間線踩單車，但根本唔夠汽車快所以好難做。另一就是靠向右線，就可以keep住一直去了。」但這樣做的問題就是右線汽車開得較快，會增加危險性。另一方面，香港經常都有路面工程進行，但很多時工程完結後，瀝青未變硬前，路已經開放使用，「所以在路面經常都會見到重型車壓過後的痕迹，令路面凹凸不平，這樣踩單車就最危險！」
坐港鐵大車拆轆
話雖如此，他還是堅持每天外出時都要以單車代步，「我平時主要踩單車由佐敦過海去中環、去觀塘及黃大仙，因為來往九龍及香港都比較容易。」他說如果往觀塘，會由窩打老道轉入亞皆老街到九龍城，之後就會轉到太子道再轉入觀塘道；但如果由九龍去新界，例如到荃灣要經過一段時速100公里的葵涌道，因為汽車實在開得太快，隨時搞出人命，所以他寧願轉搭港鐵再踩單車，以策安全。「其實只要你將架車摺埋，搭港鐵就一定可以上車，但如果是大車就要拆前轆；上巴士就要先入袋才可以攞上車，但因車廂窄，所以要細車才可乘搭。」
踩單車快過坐車
「如果你問我，我就覺得現在香港不太適合以單車代步！」這是阿誠對踩單車代步的感想，他8年前開始斷斷續續地踩單車返公司，由以往黃大仙去荃灣，到現在轉行當差到秀茂坪警署上班，都會拿出他的寶貝單車上路，「因為真係快過坐車，好似我由黃大仙去秀茂坪，坐車要35分鐘，踩單車15至20分鐘已經到了差館，就算踩去荃灣都只係45分鐘。」那為甚麼要反對呢？他認為與外國相比，香港的道路根本沒有為單車人士着想，「你不是踩單車徑嘛，香港好多路都窄，只有單線行車，所以要同車爭路，加上香港路面左補右補凹凹凸凸，好容易炒車。」所以他建議若要踩單車上班出街，應事前做足功課，看地圖或實地視察路面情況，而購買單車時車轆越大越穩陣，而摺車因為個轆好細，比較難平衡，會搞到個人左搖右擺！」他推介台灣品牌Giant，價錢介乎千多至幾萬元一部不等；韓國品牌Dahon售價約數百至萬多元一部，「其實買一部$3,000至$5,000已好夠用！」
