電視廣播（511，下稱TVB）噚日公佈，搵咗八達通前行政總裁陳碧鏵（洋名Prudence）做國際業務總經理。
八達通舊年因為出售客戶個人資料搞到滿城風雨，雖然坊間對身為舵手嘅Prudence喺事件中「前言不對後語」嘅做法好唔滿意，但係亦有人慧眼識英雌，其中一個就係TVB事頭婆──「六嬸」方逸華。
六嬸欣賞陳碧鏵肯孭鑊
聽講，六嬸因為Prudence喺八達通事件中肯企出嚟認錯，仲孭起隻黑鑊，好欣賞佢嘅表現，於是搵佢加盟。不過，過程唔係一帆風順，好多人有意見，結果當然敵唔過六嬸啦。
查實TVB嘅國際業務部，主要負責公司嘅海外業務，最大嗰嚿係已經運作得好成熟嘅台灣TVBS，其餘就係喺海外華人市場發行集團嘅節目；家有咗互聯網，再加埋Youtube，其實已經無咩特別嘢可以做。之前幾年仲係由集團總經理李寶安兼任，今次搵Prudence入嚟究竟係有新搞作，定係好似傳聞咁，削李仔嘅權就不得而知。
三個女人有新搞作？
六嬸有幾精明唔使多講，Prudence係企管人，之前喺香港電訊、數碼通（315）、VISA國際同八達通做過，專長係sell產品；仲有之前入主TVB財團股東之一嘅台灣女首富王雪紅，最出名係旗下宏達電生產嘅HTC智能手機，iPhone4未出之前好多人都有用。
宏達電近日就想收購美國網遊公司Onlive，嚟緊又收購喺無線多媒體傳輸領域具領導地位嘅SaffronDigital，三個女人聚埋一齊，你估佢哋想做啲乜呢？
李華華
mailto:[email protected]