噚日置富產業信託（778）搞咗個傳媒新春午宴，主席趙國雄帶埋寶貝女趙宇，同泓富產業信託（808）行政總裁徐英略一齊出嚟，同傳媒朋友講吓業務、傾吓偈。趙國雄一嚟就力sell兩幅人手揮毫嘅對聯，起初大家仲以為係佢親自題字，啱啱想讚佢有文采時，先發現原來呢手咁秀麗嘅字體，係出自趙宇手筆。
話說趙宇知道記者誤會咗，即刻拉埋老竇一邊講清楚。趙國雄話自己手字其實都唔錯，仲笑笑口講：「佢頭先喺屋企寫完再拎過嚟，但係無帶墨汁，我想寫番手都唔得。」講番副對聯──「中資外資聚泓富 人氣才氣滙置富」，集齊兩間公司嘅名，幾有意思。
身為置富副行政總裁嘅趙宇咁有才氣，但佢平時都鍾意睇電視時裝劇同八卦雜誌，「睇多啲先唔會喺商場活動時搵錯明星嘛！」