郭晉安、廖安麗噚日同成班《依家有喜》嘅演員坐開篷巴士喺金鐘同中環行大運，佢哋沿途喺車上向途人拜年，跟住喺中環落車派海報同糖，唔少內地旅客同龍友追住佢哋影相同簽名。
安仔話老婆歐倩怡懷嘅第二胎好大可能係女，預產期大約係六月。佢話初一至初三要四出拜年，一日要去三、四個地方，連阿仔都嗌攰：「聽到阿仔咁講好心痛，所以諗住遲啲同佢去海洋公園玩，跟住又會放一個長假陪佢，到四月先返內地拍劇，劇組人員好好，會先拍晒我啲戲份，畀我喺六月頭返嚟陪太太生BB。」
歐倩怡狀態好
講到BB性別，安仔話：「醫生話好大機會係女，我哋好開心，但阿仔反而想要個細佬，佢開頭都唔太接受，可能怕分薄咗啲愛，所以我會慢慢解釋，等佢明白屋企多咗個新成員。」安仔仲話老婆狀態好好，可能有咗第一胎嘅經驗，好多嘢都放鬆咗。
患感冒嘅廖安麗話農曆年好多朋友去佢屋企拜年，佢家未有再拍劇，但工作都排到密麻麻，之後會同廖啟智合作做舞台劇。