偷拍Movie日記

古老人鍾意寫日記，近年興寫Blog取代之，跟住會興乜？Canon新推IXUS115HS話畀大家知，會係Movie式日記！每次影相前，佢會自動幫你拍下幾秒短片，一日總結、自動Jam成一段日記式短片，記錄生活趣味點滴，完全不經意！

記者：許福合
攝影：陳盛臣
Model：Kinki@PureModels

MovieDigest短片摘要

DC不論大小，基本必備拍片功能，拍時一段段，放入電腦亦散收收，有幾人會痛下苦功將佢剪輯起嚟？這可還涉及軟件及技術問題。IXUS115HS新玩MovieDigest功能，每次影相前，會隨機拍下2-4秒不等的短片；一日下來，相機會將這零星影片，以時序順排成一條類近日記式短片！男朋友在對焦框上Chok樣過程，女友補妝、整Bar帶，鏡頭以外喜怒哀樂、生活點點滴滴，會化身成一條「零碎快剪式」日記Trailer，效果絕對有種「完全失控」嘅真實感，每每令你捧腹大笑！但留意，影片超過4GB以上，就會自動分檔。

■有銀、灰、藍、橙及粉紅五種機身顏色選擇。

HSSYSTEM夜拍最強

IXUS115HS使用全新HSSYSTEM，在DIGIC4處理器支援下，對高感光度或較暗環境拍攝，效果會更好！例如因長時間曝光而造成影像模糊，115HS所拍攝的相片，影像線條會硬番晒，此外雜訊控制亦明顯較上一代好。愛夜拍的話更要留意，內置「手持夜景模式」，當按下快門時，會連續拍攝多張相片，再自動選出最小震動及最少雜訊嘅影像，合併成為一張相片，令用家毋須使用腳架，都可以應付夜景拍攝！