繼承華叔遺志，唔係靠把口，要靠雙腳，支聯會副主席蔡耀昌日前率領支聯會義工通街跑，為嚟緊支聯會六四22周年嘅22公里「毋忘六四長跑」探路。
華叔生前交帶落，希望支聯會今年大搞辛亥革命100周年活動，因此今年長跑加入辛亥革命元素，仲破天荒由沙田中大出發，終點係港島中聯辦。
蔡耀昌透露，支聯會長跑隊伍會在擺放新民主女神像嘅中大跑一個圈，再搭港鐵到擺放另一個民主女神像嘅理大，之後沿星光大道去尖沙嘴碼頭搭船到灣仔金紫荊廣場。
登陸港島第二站係銅鑼灣時代廣場，以示毋忘民主女神像被食環署無理沒收，最後跑去中環中山史蹟徑、中山紀念館，以西環中聯辦為終點。跑勻港九新界，路程長達22公里，等於跑半馬路程，蔡耀昌同一班支聯會義工話要加緊練習，目標係參加嘅幾十人都可以跑畢全程。