八方兔年行大運，趁農曆年入菜園村行咗轉。菜園村關注組葉寶琳話，年初三、初四一連兩日嘅「新春糊士托．菜園滾滾來──大型廢墟藝術節」，有成3,000人次參加，好多市民入村撐村民。當中，包括「樂壇長毛」、謝安琪御用監製周博賢；佢仲帶埋禮物，將陳奕迅首《浮誇》改編歌詞成《浮腰》，喺「糊士托」個音樂會上獻唱，贏得村民同網民掌聲。
《浮誇》變《浮腰》
周博賢同八方講，創作靈感，自然係來自朱凱迪早前疑似俾港鐵保安員一招「浮腰」撻地事件，「我即時聯想到《浮誇》嗰幾句歌詞」。結果副歌變成「你對我用浮腰吧，黑帶高手我不怕……」除咗「浮腰」，佢仲加入唐英年針對80後嘅「車毀人亡」論等等元素。
由於係舊曲新詞，周博賢只係喺年初二用咗一晚就搞掂。佢話，想入菜園村好耐，知道有今次活動，即刻做嘢撐村民，「可能因為傳媒報道少，坊間唔少市民唔明件事，以為村民收咗賠償賴死唔走」。
周博賢現場獻唱雖然有些少走音，但誠意可嘉，有網民喺YouTube睇片後留言：「為周博賢喝采，為正義喝采！」八方問周博賢，其實有冇諗過搵Eason唱，周博賢話有諗過，但牽涉唱片公司、歌手經理人等，問題較複雜，但佢真係諗緊將一啲社會性作品結集，希望下半年成事。
至於新菜園村路權問題，葉寶琳話，身在外地嘅劉皇發今日回港，發叔早前同佢哋講，年初七鄉議局團拜時事件應明朗化，又放風話可能唔使割地又唔使50萬。葉寶琳話村民唔想有特權，總之「應該嘅錢畀應該嘅人」就得。
《浮腰》
（改編自陳奕迅《浮誇》）
叫完又叫，捍衞這村
但是無人來
已陳述理由耐性地喊寃
得不到刊載
然後被誣捏密室裡稱帝排外
車毀更沒有將來
弱勢已經夠慘但你竟倒轉喝采
白癡得多麼意外
是別人住的家
絕情地輾碎做一堆磚瓦
電視與家俬，道義跟公理
也被這推土機破壞拆垮
你對我用浮腰吧
黑帶高手我不怕
作社論繼續塗黑吧
休想我變卦
來吧對正義也肆意用浮腰吧
腰板足可以招架
夠直和夠硬難撞花
將我撻嗎
種子跌落田，便種出
處處茉莉花