天文台科學主任日日上鏡報道天氣，天文台長李本瀅可能不甘寂寞，今個月開始在港台第四台客串開咪，主持《音樂風雲變幻時》環節，原來李本瀅係古典音樂發燒友，「如果只識科學，唔知文學、藝術、音樂為何物，做人會損失好多。」
李本瀅職業係預測天氣，開咪三句不離老本行，佢話氣候資料顯示，蕭邦養病時住嘅馬約卡島，下雨日子特別多，造就咗蕭邦1838年有感而發寫成《雨點》前奏曲，係天氣影響藝術創作例子。
除咗蕭邦，李本瀅指大自然亦為19世紀初好多作曲家提供創作靈感，柴可夫斯基、馬勒都寫過好多同大自然相關嘅經典，面對氣候劇變，冬天可能消失，佢話日後聽韋華第《四季》同柴可夫斯基《季節》，感受可能好唔同。