周麗淇（Niki）做女主角嘅新劇《我的如意狼君》開拍咗一段時間，Niki早排因為舊公司bma合約束縛，遲遲唔能夠現身無綫，噚日Niki終於正式歸位，光明正大亮相將軍澳電視廣播城拜神兼開工，仲同男主角黃浩然互派開工利是。
冧掂李添勝
Niki稍後先會再簽經理人同歌星合約，其實佢可以考慮順勢做無綫人，話唔定可以同林峯拍住上呢，Niki一聽到就話：「我唔夠佢chok，但佢幾好丫，歌影視都有好發展，都好喎，無綫仲未有女版喎。」
不過，Niki話一切都要等拍完劇先算，為咗專心喺無綫開工，Niki專登推晒外面啲工作，難怪監製李添勝當正佢新抱咁錫，Niki話嫁得出一定會斟茶畀添哥飲。
浩然入產房
黃浩然就同監製同演員報定喜會隨時走佬，皆因太太差唔多生得，佢仲話有意親自入產房影相，仲連相機都買埋，浩然又希望日後親自為BB影相。同劇嘅葉翠翠今年第一年派開工利是，佢好主動見人就派，好享受獲得祝福嘅感覺。