對車迷來說，一個「安樂居」同一架「安樂車」同樣咁重要。趁住新年換新裝，我哋搵嚟風水師高萌禧為大家講講今年兔年各個生肖的最佳車內擺設，等大家幫心愛座駕添新裝時，順便增運招財保平安兼催桃花，年頭行運到年尾。
文：周達之
攝影：陳盛臣
模特兒：CC
高萌禧
自小鑽研術數及風水命理，於多本周刊撰寫玄學專欄，於電台及電視台主持玄學節目。
擺位毋須深究
今年兔年最適合放甚麼擺設？高師傅話駕駛最緊要係平安，為了合太歲，十二生肖中，除屬龍及雞外，屬其他生肖的最好擺放狗仔擺設，例如斑點狗毛公仔之類，咁就可以催旺運氣保平安；而屬龍的可擺放一些日本傳統福娃或貓貓毛公仔，如HelloKitty等；屬雞的除貓公仔外，也可選擇豬仔毛公仔，例如麥兜等。至於飾物的擺放位置，據高師傅所講，原來係唔需要深究，因為駕車時車的方位經常改變，與車內物品的擺放位置無關，所以無論放在擋風玻璃前、後座或者掛在倒後鏡上都可以，大原則係唔影響到駕駛安全。
配色襯號碼
今年經濟繼續好轉，相信唔少人都會晉身車主行列，打算買車出新車牌的朋友，不妨參考吓列表中自己所屬生肖於兔年的幸運號碼，咁就可以出個靚車牌，行運行足一年。除咗幸運號碼，表中亦會列出各生肖的幸運顏色，在選購車窗窗簾、坐墊時就可以揀個旺自己的顏色。
掛圓玉器保平安
至於駕駛搵食車的朋友，高師傅建議最好擺放招財貓公仔，或者將鯉魚或金元寶的小飾物掛於倒後鏡上，咁就可以保你來年做多幾轉生意，想保埋平安就不妨掛些圓形玉器或福字牌等小飾物。而未有伴侶的就可以選購一些氣味清淡的香薰座放在車內，咁就可以加強人緣催桃花。
查詢：23924244（台日汽車用品）
