公民上個月喺銀牌決賽戲劇性反勝衞冕嘅南華，歷史性首捧銀牌，仲要攞埋2012年亞協盃參賽席位。有咁好成績，球隊高層應贊助商要求，喺噚日搞港島勝利巡遊，但架開篷巴士回程時突然加一站去大球場，路經南華會時班球員仲high過當日贏波，之後就以南華會大樓作背景影威水相，今次真係攞景兼贈興囉！
公民過去幾季喺本地球壇都扮演黑馬角色，而呢隻黑馬今季出閘喺聯賽脫腳，但銀牌就發威捧盃，球員分咗高層同贊助商成百萬獎金同獎品，噚日朝早就首次搞勝利巡遊，我求大俠都有隨行趁熱鬧。公民架開篷巴士喺跑馬地社區會堂出發，原先路線為先去香港仔，再經銅鑼灣去柴灣，最後返跑馬地，但最終路線改為先經柴灣，經北角英皇道去中上環，之後折返跑馬地作終點。
沿途市民揮手叫好
雖然公民人氣唔及南華，但沿途反應幾好，好多市民都有同球員揮手。踢南華時已有勝利巡遊經驗嘅迪天奴，去到北角同銅鑼灣呢啲旺區就帶領隊友唱歌，又猛同市民講恭喜發財，唔少市民都望多幾眼呢架掛住「公民進軍亞洲」橫額嘅開篷巴士，唔少自由行同胞仲用相機影相。
原本跑馬地係終點，巡行唔知係咪興奮過頭，竟然變咗大球場做終點，當經過加路連山道南華會，謝德謙、迪天奴同黃耀富等功臣，就隨即攞住個銀牌影相，搵到咁應嘅「景」嚟贈「興」實在一絕。
公民主席貝鈞奇巡遊完笑笑口話，仍回味當日反勝嘅情景，亦體驗咗永不放棄嘅崇高體育精神，同時提醒球員唔好自以為是，如果季尾贏埋嘅足總盃，球員可分百萬獎金。據聞神勇捧盃嘅公民已經搵到新贊助商支持，我求大俠就希望本地球壇喺新一年百花齊放，咁樣球圈先會興旺。
