是日人日，人人生日，唔好期望有人同你唱生日歌，對自己好啲就算啦！連日拜年舟車勞頓，今日我就咩人都唔理，拉埋阿雪直飛曼谷三天兩夜，會合胡慧冲，來個「是吧米蓮三重奏」！
記者、攝影：曾冠輝
模特兒：孫慧雪
第1重
摘星泰菜 冰火冬蔭功啫喱
「喂Roger，新年流流特登飛去曼谷，係咪有好介紹先！」「梗係有，冬蔭功你飲得多，曼谷嘅米芝蓮分子料理你試過未？」呢排年糕角仔食得多，食餐米芝蓮為兔年開年好到極！
舊年才開張的超5星級酒店SiamKempinskiHotelBangkok，住宿豪華唔使講，泰菜餐廳SraBua更加巴閉，是來自丹麥的過江龍！聽到呢度，我都以為係西餐，點都估唔到係地道泰菜。須知道目前能在米芝蓮手上摘星的泰國菜餐廳只有兩間，一是倫敦的Nahm，一是由首位「摘星」的泰籍大廚Lertchai所開，在哥本哈根的KiinKiin。咁SraBua呢？正是KiinKiin的分店，主打新派泰菜。說是過江龍，其實是衣錦還鄉。
是夜菜式由來自丹麥的大廚Morten主理，唔係頭盤、主菜、甜品、茶、啡咁簡單，一睇menu10隻手指數唔晒，足有12道！好彩道道份量細細唔怕食滯。對於菜式，你不能抱有期望，因為你永遠無法猜到接下來一道菜賣相如何，見到賣相又無法猜到味道如何，一道菜起碼給你兩個驚喜。問吓你：有無試過成個花盆擺你面前叫你食泥？將長得翠綠的植物連根拔起，原來是小甘筍，未食都知新鮮爽脆。泥呢？真係食得的，兼且係主角，原來是以青咖喱打成忌廉狀再混入麪包糠，食落香辣帶甜，過癮！傳統如冬蔭功，一樣玩出花樣，做成啫喱，在冰凉與火辣兩極的口感中互撞，刺激！出名霸道的紅咖喱，做成雪糕，含羞答答隱藏在以紅菜頭汁打成的泡沫之中，更絕是伴碟竟然是做慣主角的龍蝦，大膽！以為是分子料理，問Morten到底施了何方法術：「菜中沒有用上任何化學物質改變食材原本的味道，只是以新的手法重新呈現傳統菜式！」這趟傳統與創意兼備的味覺加視覺旅程，一吃就是三小時，驚喜無間斷！
a.SraBua
地址：991/9Rama1Road,SiamKempinskiHotelBangkok
費用：4道菜午餐約$380，十多道菜晚餐約$608
第2重
花瓣池少女是吧!
「是吧」，我是說spa呀！去曼谷必做o架啦！唔使周圍搵，Kempinski就有！同阿雪走到spacentre直入treatmentroom，浴缸早已放好水兼鋪滿花瓣，完全啱晒阿雪呢種少女嘅需要。Kempinski自家spa的理念，是使用自然植物調理身體，環境有植物香薰，護理用品亦全部herbal，借助大自然的潛藏力量使身體回復平衡，好似我哋呢種平日奔波勞碌的就最啱。這裏即使用上泰式古法按摩，都沒有太激烈的動作，力度亦適中，不會用蠻力死鑽穴位，拉筋亦恰到好處，真正使身心鬆弛。
收費：90分鐘ThaiMassage約$808
第3重
再是吧！ 4粒鐘女王享受
即使只係三天兩夜，喺曼谷單做一次spa絕對唔夠！起碼執多劑！稱霸曼谷的名牌「是吧」Divana早幾個月在Silom開到第三間分店，物業是一座90歲的英式花園別墅，純白小屋經過翻新，改裝成明亮的室內空間。未開始treatment，坐在客廳嘆杯香茅茶，身心即時放鬆。鎮店王牌QueenoftheNight，長達4小時的療程由頭護理到腳，按摩也推油，兼且用原塊蜂巢在背上磨砂，也讓蜜糖滋潤肌膚，絕對女王享受。
Divana主張融合多元化（主要是東方）的治療理念，因而又會運用印度的療法，以銅壺盛載精油，放在額上點滴，透過將精神集中一點，驅除雜念，令腦筋放鬆，使身體及精神達到自我調整。我這次試了最basic的，浸淫在青葱而寧靜的環境，加上師傅手勢到家，按按吓舒服到差點睡着。完事仲有熱茶與勁甜水果侍奉，我雖男兒身，該也有Queen的感覺！
b.Divana
收費：4小時QueenoftheNight約$2,915
地址：10ThanonSrivieng,Silom
網址： http://www.divana-dvn.com
完美句號
鬧市中心PoolAccessVilla
食飽嘆夠，當然係返酒店瞓一好覺先算完美。不過，當你推門入房，見落地玻璃門外是酒店中央的游泳池，你又未必捨得瞓住。無諗過在曼谷市中心的Siam區，會有resort至有的poolaccessvilla，酒店房間全部面向正中的泳池，除了打造成城市綠洲，Roger知道另有原因：「酒店後面係皇宮，民房、酒店等建築物一律禁止朝向，免得俾你哋黎民百姓睇蝕晒！」不過無壞吖，酒店自成一國，明明隔條馬路已經塞車塞到飛起兼烏煙瘴氣，返到酒店立即靜晒，如去到沙灘上的resort一般寫意。
房價：DeluxeRoom約$1,800
網址： http://www.kempinski.com/en/bangkok
Queen'sSpa
溫馨提示：曼谷塞車嚴重，搭BTS去Divana分分鐘快過搭的士，從BTSSurasak站步行5分鐘即到！
TravelMemo
持BNO或特區護照免簽證。泰國領事館：25216481
阿聯酋航空香港曼谷來回機票由$1,904起，查詢： http://www.emirates.com
1港元約兌3.94泰銖（文中價錢已折算港元）
220V，兩扁腳插座
泰國
曼谷
下周天晴，22-33℃
