醫管局前線忙於應付流感高峯，主席胡定旭同行政總裁梁栢賢都有巡醫院視察民情。唔知佢哋係咪想更親民，喺醫管局內聯網搞咗個blog，肥胡話想同前線喺網上溝通吓，遲啲仲想搞網上chitchat，但有前線醫生話忙到死，邊有咁得閒喎！
或加網上chitchat
個blog叫主席及總裁博客，入面有「主席隨心想」同「PY與你」，仲有片睇。肥胡第一炮叫人珍惜眼前人，因為佢做主席七年嚟，新年都有去醫院探病人，感受到健康非必然，例如遇過活潑可愛嘅3歲女孩患上難治腦病。
遲啲嗰blog可能加入網上現場chitchat，畀員工傾吓偈，但唔係個個前線人員都有時間。前線醫院聯盟前任主席羅智峯話，做緊嘢唔會得閒上網，而且同管理層傾其實冇乜用，估計都係啲官腔回應；以前蘇利民時代都開咗個信箱同員工溝通，平時亦有醫院forum，但好多時前線嘅意見都石沉大海。
八方建議肥胡同PY，不如公開個blog畀全港市民同病人，畀大家畀吓意見至得。