律師黃國桐狠批，旅行社在警方介入調查後，付錢予報稱被襲的遊客，是個極壞先例，不但令人感到這是一筆「掩口費」，甚至有可能妨礙司法公正。「警察查緊案，如果你冇畀錢，人哋可能會講多啲，可能又會講埋強迫購物過程中有冇非法禁錮之類，但係有可能因為你畀咗錢，之後人哋乜都唔講，咁就會影響咗調查」。
黃國桐表示，被襲一方若要索償，可由法官作裁決，「呢類個案通常賠一、二千，最多咪賠埋團費，點計都計唔到12萬咁多啦！」律師涂謹申表示，若旅行社在案件審訊未完就提出賠錢，做法有點危險，「如果只係作為民事賠償仲講得過，若然呢個賠償同刑事扯上任何關係，係好有可能犯法」。他勸喻各人，即使要賠錢解決紛爭，也應在案件完成審訊後才商討。本報記者