樓市好景，發展商近一年嘅新盤都賣個盤滿缽滿，為咗延續虎年嘅威勢，各大發展商已經開始催谷吓啲盤，仲好揼本咁搞吓特別豪嘅記者會。
好似四叔李兆基嘅恒地（012）咁，就準備喺下個月頭豪請記者去奧地利嘅維也納同斯洛文尼亞考察，介紹佢哋今年會推出嘅豪宅設計同用料，但係呢個團係關於邊個盤呢？恒地就冚到實一實！
查實發展商搞親大型考察團，或多或少都係反映市道嘅指標！恒地對上一次搞考察團，已經係06年去法國，新地（016）00年同06年試過帶記者去意大利同法國；長實（001）05年組過團去德國；信置（083）08年亦都試過率領一眾傳媒去法國……今年，應該係好景來臨囉！