每次睇見《狂野極速》入面啲主角經常甩住尾入彎，就好想學飄移，可惜香港無場地，亦沒有正規學校。想快速止癮、又想試試自己有冇飄移天份，香港飄移車手roBERT教大家用《GT5》賽車Game試玩，更揚言只要舞得掂入面部車，你就已經有五成的飄移功力呢！
記者：許維雅
攝影：楊錦文
Model：LaYing、Hazel@GME
場地提供：SONYHK
先預習後落場
想試試自己對飄移的興趣有幾大，今日就教大家利用《GT5》上一堂預習班，roBERT話：「覺得《GT5》可作為一個平台，因設定同真車一樣，容易學習飄移的DrivingDynamic，道理就係利用車產生的GForce力量控制入彎，感受飄移反軚入彎及方向轉移的理論。《GT5》於操控的技巧上像真度頗高，所以透過玩《GT5》先掌握飄移基本功，對日後落場玩有好大幫助！」
玩飄移好Easy
好多人都唔知《GT5》有得玩飄移，亦以為會好複雜，其實好簡單，「我買了GT5第二日，已經即時上載了一條全程甩住尾完成FullLap嘅短片上YouTube，迴響好大，個個都叫我教佢玩，所以我周不時都會喺《GT5》開間房，用住免提對講機教玩。其實仲會幫你計分，以角度、速度及波段控制、入個彎入得靚唔靚作評分，架車越打橫入得分越高！」roBERT歡迎大家於《GT5》add佢PSN「roBERT_the_drift」為大家解答疑難。
甩尾短片： http://n4g.com/news/653822/gran-turismo-5-very-impressive-full-lap-drift
初學篇之設定
第一步 設定MT手波
設定方面，好多人都以為會好複雜，架車要改好多嘢先得。其實進入版面的第一步只要揀街車模式，然後設定為「MT手波」，再將前後輪胎選用「舒適胎·硬胎」，最後關上（off）咗TCS尋迹防滑控制、防滑煞車系統及動態穩定管理就可以玩得。
第二步 揀馬力細車款
選車首要條件係後驅車，第一次學玩，roBERT建議揀馬力同性能唔好太強的車款，佢就推介MAZDARX-7SPIRITR及LEXUSISF。
第三步 揀筑波賽車場
揀選筑波賽車場練習，roBERT解釋呢個場有條夠晒闊的大直路，方便練習第一步的打圈。
初學篇之實習
第一步 控制車打小圓圈
去到筑波賽車場中段的大直路，將手掣的左邊操控桿向右邊推盡，代表扭盡右軚，再立刻將右邊操控桿向上推盡，代表全力加速，發現架車不停打個小圓圈。這時放開左邊操控桿，只利用踩放油門控制，前輪此時正處零扭軚角度自轉，即係架車明明無扭軚但會自轉，前輪向前打直。感受吓架車的車尾有無擺，有無橫向GForce力量。
道理
玩飄移的第一個理念，就係飄移時汽車的轉向及角度並非只靠軚環，亦要靠控制後輪的驅動。
第二步 推雪糕筒到路中心
熟練第一步後，控制架車將賽道右手邊的一個雪糕筒推去路中心，圍着雪糕筒再試吓甩尾打圈，這時可嘗試放開左邊操控桿，逐下逐下加些反軚動作，即反方向推動左邊操控桿，再逐下逐下以一定節奏將右邊操控桿放開再推前，放開再推前，不停加速減速。此時架車依然會繼續甩住尾打圈，但圓圈軌道的大細則有所改變，不停試打唔同大細的圓圈，試跟雪糕筒的距離拉遠及收窄。
道理
飄移其實用油門轉彎，利用馬力的大小、速度的改變，控制車身入彎的角度，感受飄移的拍子。
進階篇
1.打8字
熟習初學篇的技巧後，大家可嘗試打8字。每當架車去到8字交叉位時，放開右邊操控桿，做一個長時間的放油動作，睇到架車擺番去另一邊時，呢個時候再立刻篤盡油門，架車會反去另一邊打轉，立刻控制軚環反方向，重複甩尾打圈的動作。中間會有一段時間將左邊操控桿反方向推盡，感到力量有所轉向時，即時再全力加速打圈，重複甩尾打大細圈的操控。
2.入大彎用二波
進一步放大打圈的道理，即係將成件事放大，所需要的配合係車速放大，反軚的角度放大，即係感受油門節拍，加大反方向軚環的角度，不停反軚篤油的動作。掌握到打圈的大細後，就可套用落任何一個圓形彎道。試吓入唔同的大細彎道，逐步掌握飄移反軚入彎的理論，當架車入大彎時就打大圈，入細彎時打細圈。想入更大角度的彎，可以轉二波提高速度，圓形會更大。
3.換場實試
想嘗試多啲唔同大細角度的彎度，可揀選拉古納·塞卡賽車場，入面有好多大細不一的彎度等你慢慢練。
4.挑戰大馬力車
玩厭咗之前兩部車，可試大啲馬力的車款，好似JAGUARXKR及BENZSLS，當然操控更難。飄移時畀油放油的節拍都唔會唔同，越大馬力的車，節拍會越慢，因為每次篤油都已經有足夠力量甩尾維持轉速。
好易上手
一向好想學飄移但無機會，今次發現原來打機都得，感覺一樣過癮，令我對飄移有更大興趣。
男仔一定會鍾意玩飄移，家知道技巧唔算難，我一定會返去慢慢練。
我都唔知《GT5》原來係咁樣飄移，睇完都覺得唔難明，一定會試。
