「我20歲，學琴會唔會太遲？」網上討論區不時有這類留言，彷彿學樂器是小朋友專利。比巴打們年長成倍的恒生管理學院副校長黃寶財，40到尾才學色士風，上了八堂嫌老師教學質素差，決定自學，一年後考獲五級資格，今年4月準備考八級。原來他無管不歡，單簧管、長笛到雲南吹管葫蘆絲皆是心頭好，活到老吹到老。記者說他有慧根，他說只是學得其法，「學習要講智慧同方法，邊有咁多天才波打」。
黃教授這股吹奏狂熱，說來要感謝細仔一次駁嘴：「佢學小提琴，早兩三年進展唔係咁好，咁我諗住教吓佢，點知佢話『你識咩呀？』我諗諗吓，係喎，我都唔識樂器點教佢？」數理出身的他，千百款樂器中選中色士風，也經過計算，「吹彈拉打四種類別，拉就最難上手，吹就最易入門，咁大個人學樂器都係求開心啫！何況色士風兩萬蚊支已經係中高班，同等價錢買個小提琴只係入場，拉一年可能就拜拜」。
找了個導師，兩個月後即師徒緣盡，「好多嘢佢講唔到畀我聽，叫我自己試吓，唔係就話遲啲我就會明，我同呢位老師應該唔係咁夾」。好老師難求，作為訊息工程學系專家，自然上網上找「老師」，各大教學網站由怎樣吸氣呼氣、按指、以至樂曲試演一應俱全，加上到琴行搜購合心水的色士風書籍和樂譜，自行參透。
黃寶財：後生冇乜學習智慧
自學看似容易，付諸實行又是另一回事，「吹低音係好唔穩定o架，有時又發唔到聲，樂譜一開始都唔識睇」。但黃寶財深信只要學習有法，萬事皆可達，由研究自學色士風之道，如開發類似FlashCard的教學軟件，兩日內將所有大調小調背得滾瓜爛熟；將樂句斷成長短不一的段落，集中火力練習最困難部份；加上作息有時，每天至少練習一小時，又記下每日學習日誌，日子有功下吹奏技巧突飛猛進。
既為自娛，為何考級？「想知道自己去到乜嘢水平呀！」學藝一年報考五級即一次中鵠，當時認為八級之路太遙遠，決定稍事休息做「花心大少」：買單簧管由頭自學，又額外買入兩支低音色士風吹奏一番。友人送他長笛、葫蘆絲各一，他照玩如儀。一理通百理明，吹奏學問能應用各式管樂上，「單簧管我今年底又會考五級，最近玩番色士風，發覺技術又有進步，應該係玩其他管樂嗰陣學到啲新技巧，所以決定4月去考八級」。
與其說IQ或EQ，黃寶財更相信有LQ（學習智慧）：「後生嗰陣冇乜學習智慧，一遇到失敗就想放棄。人大咗，學識用幾多時間、乜嘢方法先最適合自己，咁就算唔再返學，一樣會叫自己學習。自學就係自摸出一條啱速度嘅路，而困難就係操fit自己嘅好時機。」正自學韓文和日文的他，一臉說服力的說。
記者夏志禮