噚日奧思集團（1161）股東周年大會喺灣仔君悅酒店舉行，華華趁新正頭，去同老闆娘余麗絲（圖）拜年兼問吓佢哋今年有乜搞作。余麗絲一見記者，即刻慷慨大派利是，但係問到公司業務，余小姐就只談風月，仲話要請大家去佢新開嗰間餐廳食開年飯。
余麗絲所講嘅新餐廳，係銅鑼灣開平道1號Cubus樓上嗰間意大利菜BellaVita同竹壽司，唔講唔知，原來余小姐係幕後老闆之一。講起呢兩間食肆，來頭唔細，竹壽司係本地餐飲品牌1957&Co.同日本「壽司幸」合作經營。壽司幸喺日本銀座創業百年，曾經獲得米芝蓮一星評價。BellaVita就有意大利名廚FrancescoPasquini助陣。
華華記起，上個月兩間公司一齊搞開張典禮，仲請咗一班英皇歌星出席，原來背後大有淵源。