通勝話，大年初六，宜動土！港交所（388）話喺將軍澳工業邨起一個超級數據中心，已經講咗好耐，原來佢哋已經靜雞雞擇好日子今日動土！點解華華會知？皆因華華都係喺將軍澳工業邨返工，每日都會途經一塊丟空嘅地皮，直到噚日，先見到裏面搭咗個有紅布嘅細台，老友同華華講，今日係好日子，財經事務及庫務局局長陳家強同一班港交所高層會主持儀式，但係就唔會請傳媒採訪。
港交所原本諗住使7億起個面積1.33萬平方米嘅數據中心，後尾將面積加大至少一個double，去到3.14萬平方米，成本增加到10億。據港交所嘅時間表，出年會將現貨市場嘅主要數據中心搬入去，跟住喺12個月之內將衍生產品同結算數據中心搬埋入去，成個plan喺2013年中搞掂。