【本報訊】從事滑浪風帆教練逾30年的「無糧」梁慶祥，可謂桃李滿園；本港80後的名將，包括連奪2006年多哈及2010年廣州亞運會兩屆滑浪風帆金牌的陳敬然，及2011年滑浪風帆亞洲錦標賽金牌得主鄭國輝，年少時均隨梁慶祥門下。回想恩師生前點滴，兩人異口同聲說：「佢（無糧）會令你有好多歡樂，令你有信心玩落去。」
「13歲第一次接觸風帆時，佢對我講，你好有潛質，前途無限，將來有機會代表香港攞金牌。」29歲的陳敬然表示，全因無糧恩師這番話，加上他的互動教練方式，令自己倍增信心堅持練下去。
口頭禪：衰咗再嚟過
陳說：「大個咗諗番起，可能佢同個個小朋友都係咁講，點都好啦，起碼對我有鼓勵作用。」上月才在赤柱訓練營與恩師有講有笑的他，形容二人關係「亦師亦友」。
「『衰咗再嚟過』係恩師嘅口頭禪，佢成日講唔衰過點會成功呢？」17年前，當年只有11歲的鄭國輝首次上滑浪風帆課程，當年的教練正是梁慶祥。鄭國輝昨說：「佢先同大家玩遊戲，用遊戲方式引導我哋；佢教BB（青少年）班嘅模式好特別，會帶畀你好多歡樂，令你想繼續玩落去，而且佢出晒名體貼。」