中國人無論去到邊都咁緊張過年，韓大輝今次升總主教撞正年初三，來自港、台兩地嘅主教神父齊齊去梵蒂岡觀禮，教宗見反正濟濟一堂，不如順便call個會，擇個日子竟然係大年初一，陳日君樞機話，本來諗住過年留喺修院煮吓紅燒肉畀班兄弟食，點知唔得；佢年卅晚落機嗰陣笑笑口同八方講，話帶咗成叠利是封畀教宗：「要大年初一開會，如果教宗唔派利是呢，我哋就唔開！」
樞機日日請人食飯
不嬲都好掛住中國教會嘅教宗本篤16世聽到陳樞機咁講，即刻叫主持會議嘅梵蒂岡國務卿貝爾托內（TarcisioBertone）幫手入利是，仲喺開會前恭賀大家新年快樂兼派紅封包。樞機靜靜雞同八方講，諗住教宗封利是都係意思意思，點知拆開有成100歐羅，即係成千蚊港紙，嚇佢一跳，佢同韓總同埋其他十幾位主教神父都有份。
八方初時以為樞機同韓總好着數，後尾睇睇吓發現唔係幾對路，事關佢哋兩個都好錫呢度嘅中國修生同神父，年卅晚到家日日請人去中國餐館食飯，樞機個人派利是過百封，教宗封利是大封極都唔夠幫補佢哋。
班教友亦懶理身在異地，日日着住拜年衫，祝聖禮嗰日坐喺聖伯多祿大殿一邊，紅噹噹幾壯觀，護衞唔使開口問都知呢班教友係嚟捧韓總場。
講開「韓總」呢個稱呼，好多教友都未曾習慣，有啲人仲嗌緊韓神父，有啲人就嗌錯韓主教，無啦啦幫韓大輝降級。佢噚日喺傳訊大學主持首祭，差不多60個神父共祭，教友好興奮，完咗彌撒係咁捉住佢同樞機影相，又向佢行跪禮同埋親吻佢嘅權戒；韓總可能唔係好習慣咁有階級，係咁叫大家起身。
每個參與首祭嘅教友都可以拎到一張佢嘅牧徽，上面除咗有代表上海佘山嘅聖母像，右手邊仲有隻國寶大熊貓，大家都覺得隻熊貓肥肥哋好趣致，韓總話隻熊貓仔係佢揀嘅，代表中國人嘅友善咁話。
mailto:[email protected]