草蜢嘅蔡一傑噚日度過咗44歲生日，前一晚佢去到中環夜店打碟兼順道慶祝，哥哥蔡一智同老婆及一班圈中好友，好似袁詠儀同張智霖、阮兆祥、伍詠薇同老公練海棠及陳敏之等到場同傑仔一齊慶祝。
一向喺圈中出名恩愛嘅伍姑娘同練海棠，以往經常糖黐豆咁出現，但自從早前練海棠俾影到同索女撐枱腳後，兩個已好少一齊現身，即使當晚一齊到賀傑仔，都再冇好似以前咁sweet，影大合照時仲分開坐，表現冷淡。不過伍姑娘見到傑仔就相當熱情，兩個先後錫咗三啖，仲嘴對嘴，伍姑娘十足當老公練海棠冇到。
蔡一智有心有力
問到點解近日少咗同老公孖住出現，伍姑娘話：「唔係，因為我家暫時冇拍劇，忙住做生意，所以都少咗出席活動，但我哋其實成日都一齊o架。」係咪一齊現身闢謠？伍姑娘話冇咁嘅需要喎。
至於壽星仔，佢話願望最緊要係身體健康同工作順利，傑仔透露今年會有好多大家意想不到嘅新嘗試，至於感情事，傑仔笑笑口話：「我06年都講過，我放晒時間同精神喺工作上，我同晒所有fans結婚喇。」問到阿智今年會唔會追多個兔B，佢表示會順其自然，仲話：「我有心有力嘭嘭聲，唔需要人工受孕o架。」