啱啱過去嘅維園年宵最具話題之作，包括三級片《肉蒲團》光明正大擺檔賣出位產品。社福界議員張國柱今年去維園為社企攤檔撐場，亦有幸目睹《肉蒲團》賣嘢兵團幾咁犀利，話離成尺遠都見到佢哋拿住個人形攬枕四圍sell。
身為淫審處審裁委員嘅阿柱喺年廿九開會時，咁啱就係要審理《肉蒲團》喺維園掛出嗰張巨型banner有冇踩界，據聞阿柱同其他委員睇完之後覺得冇乜料到，唔覺有乜不雅；至於應唔應該喺維園擺檔呢個道德問題，就唔係佢哋個小組可以控制。阿柱兔年運勢應該不俗，事關佢成功抽到立法會下周三、即兔年首個大會嘅動議辯論機會，力促當局撥地畀社福機構發展。