今日係大年初五，華華喺度恭祝大家開工大吉、虎盡金來、兔年套利！今年辛卯年係木火之年，坊間認為喺各行各業之中，以屬木同屬火嘅行業最旺，有利投資。依照金生水、水生木、木生火、火生土嘅排序，屬水嘅行業今年走勢麻麻。不過話雖如此，五行之說只係其中一個參考，各行業嘅走勢始終同經濟呀、行業呀呢啲基本因素連繫住，華華就同啲分析員傾過，再根據五行所屬行業今年嘅基本面嚟做分析，畀大家參考吓！
木 紡織業需求強勁
舊年棉花價格急升，一年之內升幅接近一倍。除咗中國、美國、巴基斯坦呢啲地方因為天氣差而導致棉花失收之外，美金疲弱亦都令到商品價格走強，加上人為炒作，種種因素引致棉花價格越升越有。原料成本上漲，紡織股嘅壓力自然唔細！
華華同啲分析員講起，佢哋就普遍認為今年整體棉花供應仍然短缺，起碼要等到年中先會有改善，但係價格升勢應該比舊年稍為放緩。
由於市場對紡織品需求仍然強勁，企業有能力將成本轉嫁客戶，尤其係處於產業鏈越上游，議價嘅能力就越高。瑞信就估計，生產棉紗嘅企業，好似天虹紡織（2678），應該可以百分百轉嫁成本；至於織布商好似魏橋紡織（2698）同互太紡織（1382），就只可以轉嫁50%至80%。
除咗紡織股之外，造紙股亦都係原材料價格急升嘅受害者。舊年第一季智利地震同芬蘭港口工人罷工，都令到紙漿價格急升，國際廢紙價格亦都展開升勢。少咗呢啲特殊因素，今年嘅紙漿價格會較為平穩，雖然成本壓力仍然喺度，但係透過提升產品組合同生產效率，造紙企業嘅每噸紙利潤水平，應該可以維持。
造紙業整合繼續如火如荼咁進行，大型紙廠好似玖龍紙業（2689）同理文造紙（2314），有望擴大市場佔有率。不過，各大紙廠密鑼緊鼓咁大搞擴張，未來幾年要密切注意會唔會產能過剩喇！
火 新能源業火熱之選
經濟環境向好，作為經濟發展源頭嘅能源行業，「燒得着」嘅能源資源行業自然水漲船高，加上能源短缺係國際大趨勢，「燒唔着」嘅新能源行業亦都成為投資火熱之選！
內地加速工業化同城鎮化，經濟發展對能源嘅需求，真係唔使華華講你都知啦！舊年內地能源經濟回升形勢不斷得到鞏固，能源消費更加不斷上升，國家能源局對今年能源行業嘅展望樂觀，估計需求仍會增加，但係增速就可能放緩。
由各項能源供應嚟睇，煤炭今年嘅產能，會受惠於煤炭大省山西第一批完成整合嘅煤礦產能釋放，令到供應得到支持；另外，煤炭淨進口就有望多過舊年，支持內地對煤炭嘅需求。
油氣方面，煤層氣、進口液化天然氣同管道氣，對內地市場供應亦都提供支持，隨住中海油集團舊年實現油氣產量5000萬噸，海上油氣資源亦都成為油氣供應嘅主力，令到今年油氣供應樂觀。
總括嚟講，國家能源局對今年能源供應嘅評價係：「不出現大的意外情況，是能夠滿足全社會對能源的需求。」換句話講行業將穩定跟隨經濟發展。而新能源行業，喺節能減排嘅大環境下，為咗支持產業發展，市場憧憬中央政策支持，而喺政策推動下，勢成為市場焦點行業之一！
土 中港地產中規中矩
五行屬土嘅地產股，喺兔年嘅表現應該中規中矩。面對低息同通脹環境，對華華呢啲普羅大眾嚟講，買樓始終係最實際嘅投資渠道，咁，中港樓市自然可望穩定向上啦！不過，樓價高企跌唔落，亦都令到政府好緊張，舊年已經連番出招打遏樓市同收緊銀根，而喺政策陰霾之下，地產股今年可能要炒波幅。
中央舊年4月開始出招打遏內地樓市，但係大部份內房股超額完成舊年嘅銷售目標，兼且提高今年嘅目標！即使中央早前推出「國八條」，重慶同上海落實徵收房產稅，發展商對後市依然持審慎樂觀嘅態度。首隻公佈舊年業績嘅內房股碧桂園（2007），就預期今年銷售會增加30%，達到430億人民幣。
正如高盛所講，家唔少內房股嘅股價比資產淨值折讓達48%，今年市盈率只係11.5倍，距離高盛最「熊」估值預測，只有2%下跌空間，下跌風險有限。
香港樓市亦都面對政策風險。政府舊年11月中提出徵收特別印花稅同提高按揭成數打擊炒家，一下子令到樓市降溫，價量齊跌；但係兩個月之後，要買樓嘅人始終會去買樓，供不應求令到新招效應減弱，價量回升。利嘉閣地產統計50指標屋苑，今年1月就錄得2857宗買賣，按月激增60.8%，仲創咗3個月新高㖭；平均樓價就升咗4.1%，去到每平方呎6028蚊，幅度更加係08年1月以嚟最大。
金 金屬商品反覆靠穩
全球極度寬鬆嘅貨幣政策，過去兩年為熱錢周圍流竄製造咗最佳嘅投資環境，資金蜂擁流入新興國家，推高當地資產價格，商品同房地產價格舊年就升到嘭嘭聲！面對通脹風險急速升溫，各地央行冇辦法唔出手壓抑通脹，相信今年貴金屬呢啲商品嘅價格喺加息預期之下，難復舊年強勢，估計相關金屬股嘅表現會反覆靠穩！
即使歐美低息政策仍然會持續一段時間，但係經濟表現依然呆滯，對金屬呢啲商品嘅需求比較弱，加上中國同印度兩大黃金消耗國，亦都因為金價高企而對消費用黃金嘅需求減少，變相令金價冇咗再上一層樓嘅動力。
唔單止消費用黃金嘅需求下降，投資者對黃金嘅興致亦都明顯降溫。截至1月27日止，全球最大黃金上市交易所買賣基金（ETF）SPDR金ETF（2840）嘅黃金持倉量跌到1226.546噸，係舊年5月底以嚟嘅最低水平。
華華問過瑞信亞洲區首席經濟分析員陶冬，佢話雖然長遠睇好金價表現，但係金價家已經相當高，令到環球央行增持黃金嘅意欲下降，相信金價今年會出現調整。事實上，金價已經連續9年錄得升幅嘞！
不過，投資銀行就普遍繼續睇好今年金價，高盛估計每盎斯會高見1650美金，美銀美林就估見1500美金，德銀最「牛」，睇2000美金。咁啲證券商睇好邊隻黃金股？招金（1818）同瑞金（246）比較多證券商捧場囉！
水 金融業仍被看好
華華根據玄學家蘇民峰嘅分類，金融業係屬水嘅，而坊間就有人認為屬金。Anyway，金融業一向深受投資者愛戴，踏入兔年，市場仍然睇好中港銀行業，雖然調控嘅陰霾未散，內銀股仍然會因為內地經濟迅速增長而受惠；香港銀行業就因應離岸人民幣業務崛起，成為新一波嘅業務增長亮點。
鍾意中資銀行股嘅朋友，呢行今年勢將繼續受大陸經濟快速增長帶動，其中由投資大行高盛對中資銀行嘅強勁盈利增長前景滿懷信心，可見一斑，中信銀行（998）H股同招商銀行（3968）A股，更加畀高盛列入「確信買入」名單。
不過，買中資銀行股，要留意大陸喺春節假期之後嘅調控措施，包括會唔會進一步加存款準備金率、加息，同埋再限制貸款增長等。
香港銀行業就水頭充足，建銀國際繼續睇好，指港銀係全球最資本充足嘅銀行，銀行體系槓桿亦都係最低之一，加上人民幣市場喺本港嘅急速變革，為港銀體系提供新養份，係支撐港銀長遠增長嘅新引擎。
港銀面對嘅主要風險，包括通脹同負利率持續，呢啲都會減低實質財富同局限貸款利差。總體嚟講，港銀仍然係一塊穩陣嘅石頭。
航運股受累供過於求
至於保險股，有指內地保險業已經踏入黃金發展期，但係要注意限制銀保合作對行業嘅影響，睇吓保費收入可唔可以維持。
同屬水嘅航運股，今年繼續面對新船下水量多，供過於求，拖低運費嘅問題，作為乾散貨船運費指標嘅波羅的海指數，上個禮拜跌到09年初嘅低位。
李華華
mailto:[email protected]