每逢新春佳節，唔少笑片都大收旺場，我求大俠都好似普羅市民咁，搵套開開心心嘅笑片度歲；港產嘅就有「宇宙最強」搞笑，另一邊廂嘅「獎門人」就搞溫馨。西片方面，外父同女婿大鬥法就去到第3集，香港票房都幾好；不過原來英超亦都上映緊另一套外父女婿鬥法片，今次做「非常外父」係新特蘭領隊布魯士，佢個「哎吔」女婿竟然就係舊將戴倫賓特（D賓）。
嫌「女婿」風流成性
英國《世界新聞報》周日爆呢單新聞出嚟，簡直就好似翻版《非常外父》咁過癮。話說今季初，D賓仍然係新特蘭球員，喺朋友聚會中結識艾美布魯士（AmyBruce）；之後佢就開始約會呢位布魯士嘅23歲愛女。
起初D賓都好識做，唔想激親「未來外父」，只係偷偷地搞地下情，點知單嘢好快就傳到去布魯士耳邊，布魯士就好嬲，一嚟認為D賓冇職業球員道德；二嚟知道呢位27歲英格蘭前鋒一向風流成性。唔知係咪護女心切，布魯士喺1月轉會市場關閉前，突然將D賓以2,400萬鎊（約3億港元）售至阿士東維拉，諗住嚟一招棒打鴛鴦。
D賓轉會維拉仲好
不過布魯士嘅心計，肯定冇戲中做退休FBI嘅羅拔迪尼路咁好嘞；D賓既然已經轉會，就更加唔使睇你面色，艾美亦都愛情至上，懶理阿爸嘅感受。上周五狗仔隊就影到D賓同艾美步出維拉練習場附近嘅四星級酒店，雙雙結伴並肩而行，如沐春風嘅D賓舉起隻手指公，係唔係大讚艾美好鬼索呢？
D賓媾掂艾美之餘，轉會維拉仲加到8萬鎊周薪，最新公佈嘅英格蘭國腳名單中又有份，睇個勢好大機會同朗尼合作對丹麥，比屈喺東北部嘅新特蘭好幾倍。衰啲講句，布魯士今次就好似三國嘅周瑜咁，真正「賠了夫人又折兵」。
