兔年伊始，祝大家投資炒賣得心應手。年假前半日市港股急升426點，重上23900樓上，氣氛轉好，技術上可進一步攀升。
年假期間花旗股市偏好，道指靠近12100收市，埃及局勢未見惡化，有利港股今日紅盤高開，不過，之前一日升幅大，恒指短線阻力位喺24500，都幾近，恒指逼近呢個位應該會觸發獲利回吐，因此，若恒指開得太高，宜避免高追，改為候調整低位收集。
江銅C輪26047：江西銅業（358）上日報收25.75元，升3.4%。股價1月份喺27元水平呈雙頂回落，近日喺50日線找得支持，橫行整固，已重上20日線，短線有機會再試高位，突破睇28.50元，可以諗吓隻C輪26047。
隻輪現價17仙，2011年5月4日到期，行使價26.88元，溢價11%，引伸波幅42.3%，槓桿率15倍（有效7倍），正股升上28.50元，26047睇32.6仙，升幅近9成，正股跌穿24.80元就沽咗隻輪。
俊樺