大天窗陪過年　吉星拱照

大天窗陪過年　吉星拱照

今年新春日日陽光普照，向代理借來Subaru七人車Exiga長測，憑藉天幕式大天窗，陽光、藍天與白雲盡收車內，猶如吉星拱照夠晒意頭！但每到晚上則感到寒風，這時車上的暖氣及暖凳則大派用場，暖笠笠過新年。

記者：徐影龍
攝影：周旭文
Model：Betrys@GMEModels

天窗美景如畫

■特大天窗橫跨近三排座椅，令車內充滿陽光感。

Subaru幾款四門房跑同SUV，市場頗為受落，早排旅行款七人車Exiga到港，發覺其實一樣充滿賣點。新年密集式趕稿關係，四日長測中，揸住佢走勻港九新界瘋狂影相，行咗近400公里，對Exiga有更深了解，尤其中後排乘客，由Model到攝影師，評語大抵一致向好，呢點最難得。
首先外形近似一架Wagon旅行車，上落就如私家車一樣，比好多賣豪華嘅高身七人車更輕鬆。最多人讚係巨型天幕玻璃，由前排一直延伸至中排之後，天窗面積貼近車架邊框，抬頭望住藍天白雲，美得如一幅風景名畫。充滿開揚感之餘，陽光暖意亦充斥車廂，加上恒溫暖氣系統，以及高級車先有嘅暖凳設備，就算早排連日氣溫低至10℃，大家仍感受到說不出嘅溫暖，難怪靚女Betrys每影完一個Shot，都急急匿番入車取暖。

■尾排空間唔算DogSeat，而且座椅稍高，視野無阻隔。

■前、中排座椅相當軟熟，攝影師坐大長途車程必瞓。

■最愛機頭個DirectUSB，直接控制iPod、iPad揀歌仔。

■錶板有藍光襯底，睇得清晰！

■中排可將中間椅背拉下，變成兩個人嘆嘅杯架同手枕位。

■前排座椅附設冷暖設備，名副其實冬暖夏凉。

■連車前玻璃都夠闊夠大，入大彎都唔怕被A柱遮擋視線。

摺低座椅空間即到

有讚亦有彈，若中排退得太後，後排空間會幾逼，跟傳統七人車有點距離。凡事有兩面，我反而覺得較適合一家四口人士，閒時摺低尾排，令Exiga擁有極大尾廂空間，裝載賀年禮品又或一行人大褸同手袋等物件，絕對綽綽有餘，尾排嗰兩個位，大可當Bonus，必要時坐多兩個人都應付到。

■若將尾排放低，尾廂容量提升三倍以上，桃花都塞得落。

■「S#」模式比「S」反應靈敏迅速得多，尤其大斜路由零起步。

七人車一樣玩熱血

喺呢四日長測入面，曾跟多款名車同場「拍跳」，就算對住歐系揭背辣跑影Pan車，Exiga亦毫不輸蝕，全程緊貼。全因Exiga流着Subaru瘋狂的血，配上225匹Boxer偈，Turbo爆發時令頭中段加速相當有力，由屯門公路直入流浮山，轉入蜿蜒小徑，+/-波及SIDrive智能模式更得以大大發揮，手動拖波相當順暢，全時四驅將動力分配得相當好，就算翌日走入中環經歷大塞車，Exiga仍相當靈活，就好似揸緊四門Sedan一樣，完全無七人車嘅論盡感。

女仔揸都話：爽到爆

身為男記者，試車始終較主觀，找來女同事一試，回來見到她興奮莫名地說，「架車爽到爆，最爽係由屯門公路口出九龍的大上斜，只係輕輕掂油門，就見車過車，那一刻覺得好威！令我最唔習慣係要經常要睇錶板睇實時速囉，因為實在太爽，好易超速呢！」

SubaruExiga2.0GT

引擎：1,994ccBoxer＋Turbo
馬力：225ps/5,600rpm
扭力：33.2kg-m/4,400rpm
傳動：五速+/-波箱　四驅
售價：$319,980
查詢：意美汽車（25112727）