過年前（一月三十一日）青馬大橋發生交通意外，一位保母在學童小巴上跌出（拋出）車外，傷重死亡。呢啲事好難解釋，要待警方調查。
左丁山曾在美國租車，早上在矽谷小城穿梭來往，碰到唔少學校巴士，啲巴士外形數十年如一日，在荷里活電影見過唔少，佢哋行得好慢，一定唔行快線，某次左丁山在後想爬頭，就見到學生橫過馬路，嚇到立即踩brake，以後唔敢。但返到香港又點呢，有幾次係俾學童小巴爬頭喎，最近又有兩次經驗，一次早上六點幾在獅子山公路，的士司機已行到近時速九十公里，居然有一架校巴左穿右插，從後殺上，爬頭絕塵而去。另一次下午五點幾，在屋邨出閘，出咗之後，的士司機行得好慢，隨後出閘之校巴竟然不惜逆線行駛爬頭，直撲交通燈出馬路，點知交通燈啱啱由綠轉黃轉紅，校巴先至緊急煞車停低，車上如有小童或保母，唔震散先至奇。的士司機睇到，為之破口大駡。學童校巴噃，在任何時間都應該安全第一，以學童性命、安全為重，冇理由拼命飛車嘅，趕時間不是好理由，因為返學放學時間一早已知，司機要預作安排，並且計埋塞車時間在內，學童小巴如有任何意外，司機冇可能推卸責任。
可憐香港父母，每個月交鬼咁多校巴費（幾百元起碼），將學童人身安全交付於司機，而一啲司機竟然只掛住趕時間，喂，車費貴過教科書課本，做乜教育局為咗教科書價格，去年全年以逼書商降價為己任，但對校巴安全似乎絕少出聲？難道欺善怕惡，明知書商點都係文化人，可以施壓，對住學童小巴就唔敢有「話語權」？記得去年「香港大學民意研究計劃」有一個調查，訪問一千名家長，搵到小學七大「教育與學習」開支項目，分別係（一）課外活動興趣班，一萬四千元；（二）補習費，八千五百元；（三）膳食費三千六百元；（四）交通費，三千三百元；（五）教科書，二千六百元；（六）開學物資，一千七百元；（七）補充練習費九百六十元。邊個話香港家長負擔唔起教科書呀，投訴課本昂貴呀（王于漸教授都話課本貴）？睇吓上列數字就知道香港家長幾有水。投訴課本價格貴喎，其他開支好便宜咩！