黃偉文致力提倡光復「買新衫，過新年」的優良傳統，半票買嘢精當然舉手贊成─任何藉口都是好藉口，多一個不嫌多。況且通貨年年膨脹，不爭氣的銀行存款每況愈下，只有冬夏兩季減價才勉強負擔得起購物這項日益昂貴的活動，年尾周街貼滿大出血招貼，時間上配合得恰好。橫又買掂又買，有「辦年貨」作堂皇理由，特別勢兇夾狼，可惜這幾季在巴黎行公司，樂趣大幅度下降，元兇是誰，你猜也猜不到：內地一擲千金的豪客！
不不，並非新春流流發窮惡，臨老好學唔學仇起富來，真的世界艱難啊。本來人有人買我有我買，河水井水各得其樂，除非狹路相逢搶購相同尺碼只剩一件的限量版，否則成間春天百貨畀佢買晒都唔關我事；奈何眉精眼企的售貨員習慣了大中華闊佬的華麗派頭，一見黃面孔獨行俠殺到，既無出租八人轎車在門外接送，亦無前呼後擁的同胞扶持打氣，便知此人好打有限，服務慳得就慳。那些法國人，個個是天生的優質演員，不必勞煩金像編劇寫對白，以身體語言表達什麼情緒都不費吹灰之力，眼尾瞄到你在跳樓貨櫃枱眾裏尋他，就像窮親戚趁開飯時間上門打秋豐，自然而然派贈「hae到通頭塵買減價嘢，學乜人遊埠吖笨」的蔑視，一定要你接收炙人的電波，知難而退快快消失。
所以那次陪陳小姐在BonMarche的MMM專櫃試鞋，負責招呼的哥哥仔不但專業知識豐富，對鞋身鞋踭結構瞭如指掌，還自動表示可以留貨翌日減價再付款，真的感動到想攬實他錫面珠。呃，或者那只是因為同行者貴氣逼人？