過年前，香港鬧奶粉荒，據講內地人（珠三角一帶）特別來港掃貨，一買就成箱成箱咁買，搞到本地媽咪喊咁口，要買都買唔到，於是有人呼籲向內地人來港買奶粉要徵收離境稅。
徵稅之議，講吓就得，要實行就極困難，理論上香港亦不可能向單一貨品徵收特別稅，技術上，專就「離境奶粉」徵稅要改變本港稅例，動搖簡單稅制之根本，政府那敢輕舉妄動，理論上，香港百幾年來係自由港，只向極少數貨品徵入稅，奶粉顯然不屬此類。內地不是沒有奶粉，而是內地奶粉品牌全無公信力，有啲食壞BB，內地媽媽被迫來港買真貨，價錢（連旅費）及時間不計。香港奶粉入口商本來知道本地出生率低，奶粉市場並不大，但有幾多內地媽咪來港買奶粉，又好難估計，一旦出現內地人來港搶購，先至會令本地奶粉市場出現供不應求嘅情況。入口商已經講咗啦，香港「美贊臣」奶粉直接從外地入口，內地「美贊臣」奶粉就在內地包裝。故此內地人特別鍾意來香港買舶來「美贊臣」，不願在內地買內地「美贊臣」。要解決呢個問題，「美贊臣」可唔可以在內地大力宣傳，內地「美贊臣」奶粉與香港「美贊臣」奶粉，同樣係真貨呀？
一時之間唔夠奶粉，認真麻煩，但長期嚟講，外國奶粉牌子有見及此，應會增加香港供應量，預多啲畀內地人搶購。之不過，內地入口商/包裝商必然會因此而不高興，此則有待原來生產商（譬如「美贊臣」）去協調香港大陸兩地入口商、分銷商嘅矛盾咯。
三年前一位老友去日本，捉住肥仔K帶路去買奶粉，左丁山笑佢緊張過度，唉吔，原來啲媽咪、嫲嫲有預知之明，內地人富起來本是大好事，但服務業與製造業之道德倫理觀念有落差，常以冒牌貨假貨毒害顧客，害咗中國人，益咗香港商人。曾特首大可趁此機會，建立一個香港奶粉港，請外商港商在工業邨設立大型奶粉廠，大打MadeinHongKong招牌，怕乜成本比較貴啫，內地人願意畀溢價吖嘛，立法會議員素來喜歡出位、搶分o架，工商界啲議員有機會演吓身手嘞，唔通奶粉問題都要由大律師、工會議員出聲？「經濟動力」與自由黨班議員，快啲諗橋。