鬍鬚曾自07年做咗財爺以來，每年過年嘅節目就係寫財政預算案。今年亦唔例外，因為預算案仲有17日就公佈，家已經進入最後衝刺階段；佢噚日喺網誌度話，春節難得幾日假期非常珍貴，係佢加班絞盡腦汁嘅時間。
鬍鬚曾自稱個性亦動亦靜，打功夫同西洋劍之外鍾意睇書，仲話中國功夫除咗強身健體，亦修心養德，氣功吐納練習更講究內斂心神，佢因而練得喺喜慶喧鬧嘅農曆年仍可靜落嚟睇書或者寫預算案嘅功力。
佢又話親戚長輩大部份喺美國，過年唔使四出拜年，慳番唔少時間。一對仔女又係，過年團圓唔成問題。不過，今年屋企有第三代成員加入，因為佢已經抱孫，有粒好趣致嘅孫女。