白鴿黨副主席單仲偕噚日同傳媒茶敍，評估該黨年底區選將腹背受敵，除要面對每年用成幾千萬派嘢嘅民建聯挑戰，仲要面對黃毓民組成嘅人民力量狙擊，隨時有15個現有區議會議席危危乎。
望中產踴躍投票
白鴿黨條數係咁計：黨內有15名議員，上屆僅以十多個百分點票數擊退保皇派，有三個區因為有外來候選人突然自稱支持2012雙普選，每區扯走白鴿黨500至600票，結果益晒民建聯。
單仲偕不諱言，今年會係白鴿黨最艱難嘅一次區選，惟有希望中產人士踴躍啲投票，谷高啲個投票率，至有可能達到該黨攞65個議席嘅目標。但佢早兩個星期曾經同全國人大常委范太傾過偈摸過底，理解要達標相當唔容易。
對於人民力量狙擊白鴿黨同時放生公民黨，單仲偕形容呢個符合中共「槍打出頭鳥」嘅做法，話睇番黃毓民08年立法會選舉狙擊當時冒起嘅公民黨，可見一斑，「總之泛民邊個黨起，就打邊個」。至於下年特首選舉，單仲偕話個人首選係自己個黨派人參選，次選係唔派人選，最尾至係幫人抬轎助選。