收到一位公關朋友電郵嚟嘅新聞稿，萬有街市以1蚊買餸吸引顧客，1蚊斤豬肉、1蚊個椰菜等，賣點係平過超市。新聞稿引述一個參加推廣活動嘅商戶話，「街市買餸當然比去超市抵，超市大型電視廣告費貴，餸一定要賣貴啲。」
超市購物 平過雜貨舖
睇到呢份新聞稿，令敏妮諗起前個禮拜睇電視，有位仁兄為咗向地產商說不，所以日常生活都唔會幫襯地產商旗下嘅商號，買餸會去街市，日常用品會去街坊藥房。敏妮都好同意呢位仁兄，所以用行動支持。星期日興起做拿手瑞士雞翼，以往敏妮會去附近超市一次過執齊所需材料，今次就行去老遠嘅街市，先去雜貨舖買調味料，再喺菜檔買薑、葱，又要去凍肉舖買雞翼。當係生活體驗一次半次就可以，但持之以恒真係大挑戰。
咁都唔止，整瑞士雞翼需要喼汁，喺雜貨舖買盛惠18.9元，喺超市原來賣13.9元。要一般消費者改變習慣唔去超市，分分鐘長期買貴嘢。魏力聽到敏妮咁講，搭嘴話︰「地產商賣樓賣到咁貴，就係為咗拉上補下囉。所以應該淨係幫襯佢哋嘅超市，但就唔好買佢哋起嘅樓，咁就可以賺盡嘞！」魏力當然係講笑，賺盡嘅只會係地產商，一般升斗市民點會有機會掉轉頭賺番地產商錢。
超市網絡大、分店多，喺規模效應下議價能力自然比單打獨鬥嘅雜貨舖強，至於萬有街市嘅「1蚊買餸」，明顯係純粹gimmick，又點能夠長久維持？幸好，敏妮只係偶然先下廚，要一般主婦向地產商旗下嘅超市說不，就算有咁嘅精神，亦會俾人話唔精明。
溫敏妮
http://wanmanli.com/blogs/