天文台前台長林超英早排高調反對母校英皇中學縮班。佢噚日喺商台節目再度開腔，話英皇縮班會減少區內基層學生透過吸取知識、改善生活成就事業嘅機會，無法促進社會流動，而且直資學校毋須縮班，唔公平。
不過，可能因為以前林超英做台長時，幾時掛風球、掛幾號風球等嘅決定周不時俾市民質疑，佢噚日亦以過來人身份強調，佢唔會隨便以「在野」嘅身份批評政府政策，因為佢明白政府官員要面對好多限制喎。佢又話，退休初時過份高估自己嘅能力，安排太多工作，搞到個人好攰，到去年底推咗大部份工作，全心休息，之後先體會到，即使退休亦要有適當嘅工作量咁話。