辛卯年先祝願諸君得心應手，財富增值快過火箭。兔年第一擊揀東方表行（398），兩個字：「抵買。」東方表行2011年半年度（9月底止）純利，翻咗一番到7045萬銀，成績表已經靚仔到爆。半年結打後，中港經濟及消費Keep住好景，加埋自由行及節日效應，相信集團下半年度純利，會好過上半年度。係咁易計數，東方表行2011年度純利1.55億銀，預期PE得11倍，同類零售股，東方表行最平。
又東方表行連埋上年配股，最新NAV每股3.56元，現價PB1.1倍多少少，場內同類股，PB都上兩三倍。仲要咁睇，東方表行一樣有內銷元素，家陣場內Chinaplay嘅零售股，PB兩三倍閒閒地。呢轉買東方表行，以2011年15倍PE做目標，集團價見5.68元，潛在回報率35%。
堡獅龍等爆升
堡獅龍（592）2010年度（6月底止）純利飆升咗80%，到9045萬銀。相信食住消費暢旺勢頭，集團本年度一樣肥仔水。係咁易計數，堡獅龍2011年度純利翻半番到1.35億銀，預期PE落到11倍吸引水位，平過好多同業。又堡獅龍橫行個幾月，幾條主要平均線開始滙合，又係等爆邊格局。呢轉博堡獅龍升20%到1.11元，目標價預期PE，都係得13倍。
錢雋