農曆新年假期往往是失車高峯期，多人出國旅行、歡樂氣氛減低防範之心，都是偷車賊落手的好時機。唔好以為新車科技先進就難以入手，正所謂道高一尺，魔高一丈，偷車賊層出不窮的手法已經昇華。想安心保護愛車，最穩妥的方法當然是兼備防盜與衞星定位追蹤系統，即使架車俾人偷走咗，就算裝埋入貨櫃，都立刻無所遁形，警察哥哥好快幫你搵番愛車。
記者：許維雅
攝影：譚盈傑
Model：Lincoln、Betrys@GME
熱門車參 中港車及輕型貨車
近年偷車氣氛好似稍為緩和，根據警察公共關係科提供的數據顯示，2010年報失車輛有952架，較09年的1,106架少咗154架，雖然當中有426架可以搵得番，但平均每日都有約3架失車。防盜公司負責人更透露，唔少個案都係偷車賊偷車後致電車主，要求交贖金取回失車，當中比較高危的，就係掛有中港牌的汽車，因賊人針對車主補領中港牌手續繁複呢個弱點。
好多人誤以為貴價車先係賊人目標，其實需求量大、易拆件出售的車款先係最受賊人歡迎，其中廿幾萬元的輕型貨車就係失車之冠。據警察公共關係科的數字顯示，輕型貨車是過去五年報失汽車數目最多的車款，以2010年的報失個案為例，當中包括282架輕型貨車（佔失車總數29.6%）、261架私家車（佔27.4%）及251架電單車（佔26.4%）。
10小時安裝 24小時防盜及追蹤服務
防盜警報系統已是新一代汽車的基本配備，但賊人的偷車手法與時並進，據路捷安裝及維修中心負責人林先生講，「Keyless免匙着車咁流行，賊人會喺停車場收集由遙控發出的數據複製車匙。」所以備有定位追蹤的防盜服務更可靠，連警方都承認過往曾依靠呢類型系統尋回失車。
在港經營超過十年的美國防盜品牌路捷，就係數一數二提供全面防盜、定位及追蹤服務公司。原來每架車的安裝位置都唔同，由三個技術人員獨立安裝唔同位置，所以每部車的安裝時間需約10小時。若遇上失車，路捷會提供24小時追蹤服務，由保安公司G4S的追蹤車隊趕到失車位置進一步搜尋，確實失車地點通知警方，專利RF追蹤裝置技術的定位距離誤差只有一米，過去六年錄得客戶零失車紀錄！唯一要提醒的，就係防盜系統須靠汽車電池運作，若果架車停放超過10至12日，記住撻車15至30分鐘叉電。
查詢：23698933
平民防盜功能多
開定冷暖氣
KopelLCD-2wayRemoteStart&SecuritySystem$2,500（安裝時間：2小時）
韓國品牌的雙向式遙控及防盜系統，除備有一般遙控開關防盜功能，架車俾人偷，身邊遙控立刻響起警報。三千呎以內的雙向式操控設計，可以喺鎖門的情況下遙距開着部車，夏天開定冷氣，冬天開定暖氣。此外，若然泊車位置阻住其他人，對方只要敲一敲玻璃窗，遙控亦會通知你。呢個系統更包括Turbo保護功能，車主可自行設定開關Turbo時間。
有匙變無匙
YONGJISmartStartSystem$2,800（安裝時間：3小時）
美國品牌YONGJI的防盜系統兼備keyless功能，只要車主袋住遙控行近汽車，車門會自動開啟，更可由有匙變無匙着車。相反，當車主離開汽車，車門會自動上鎖，防盜系統會自動啟動，極之方便。但由於要加裝PowerOn/Stop按鈕着車，所以安裝時間亦較長。
無距離限制
鐵將軍FireFoxAutoSecuritySystem$2,300（安裝時間：2小時）
呢個系統最優勝的是無距離限制，因透過電話網路傳送訊息，若有賊仔撬門、拍玻璃及開動引擎，主機電話會直接打去你所輸入的手提電話號碼，提醒車主盡快返回汽車檢查。即使賊仔將汽車電源截斷，系統亦有鋰電確保繼續運作。不過老闆話呢類防盜系統唔算受歡迎，因車主須額外多買張電話卡放落系統主機，感覺麻煩。
簡單方便價錢平
PLC遙控防盜系統$580（安裝時間：30分鐘）
屬經濟之選，適合無遙控防盜的舊款車，只有遙控開關車門及啟動防盜系統功能。要另外袋條着車鎖匙，比較不便。
車匙遙控二合為一
鐵將軍遙控防盜系統$900（安裝時間：30分鐘）
功能與上方PLC相同，可將本身車匙扣落遙控，二合為一方便啲。
查詢：23981651（創紀汽車音響防盜）