新年嘅必備節目除咗打麻雀之外，另一樣應該就係入戲院睇戲。呢幾年啲賀歲港產片，成日俾人批評無聊，柴娃娃得啖笑，但星爺同曼玉等喺N年前嗰部賀歲片，咪又係冇乜劇情，分別在於卡士勁啲啫。咁講真，我覺得齣戲胡胡鬧鬧唔係問題，只要睇完開心就得，千祈咪唔好意頭。記得有一年農曆新年，我同班朋友睇發哥嗰齣貪污差佬嘅西片，ending個幕真係大吉利是，搞到戲院入面啲人差啲爆粗咁滯。
兔年大年初三同埋大年初四，大家唔愁冇節目，由晏晝到深夜都有波睇。朗尼喺虎年下半季運程麻麻，但去到虎年年尾轉運，年廿九就兩粒幫曼聯贏維拉，睇嚟佢喺兔年應該繼續有運行。着住紅衫嘅曼聯，陣中又有朗尼呢個紅人，今晚作客狼隊，surewin！
青蛙仔
心水：曼聯勝[-1]
近5場戰績：DWLWL
心得：因紅魔着紅衫。