今日初三赤口！不宜拜年，最好行街、睇戲，甚至匿埋屋企煲碟！有邊套戲可以由朝煲到晚，廿四小時不停睇？無錯，咪就係《24》囉！今日搵嚟Titile勁爆嘅高清協會主席Alan，家庭影院系統設計師盈盈一齊做訪問，佢哋平日睇碟已有相當要求，咁初三喺屋企又有乜推介呢？
記者：陳國輝
攝影：楊錦文
Model：Boo、Mangie、Janie@Zmodel
Alan：撐硬《24》×《Mr》演唱會
煲碟煲咗廿年！大家一定以為Alan會推介大路外語片或發燒天碟，點知錯晒：「新年流流長，梗係要睇平時唔得閒煲嘅劇集啦！個人主打首推新一輯《24》，內容緊張，根本等唔切逐隻慢慢睇，最好一次過煲晒！再加上《24》，以真實24小時作為一個故事，留喺屋企由朝煲到晚，啱晒！」另一推介係演唱會：「一般演唱會講緊起碼180分鐘以上，平時唔得閒睇嘅話，應該趁新年煲，我嘅推介包括《MrEveryoneConcert》同五月天《D.N.A.》，多快歌、勁熱鬧，啱過年氣氛！
盈盈：翻兜《茶煲阿四》×3D卡通
勢估唔到，佢哋異口同聲力撐劇集，但路線就明顯唔同：「從《烈火雄心》開始我就追劇，本地及日韓劇集都鍾意。」盈盈話過年必睇《茶煲阿四》：「女仔鍾意愛情片嘛！」另一推介係3D電影：「2011年仍以3D電影引領AV界，所以有時間我會翻煲《阿凡達》、《冰河世紀》同《美食風球》等3D藍光」。去過美國CES嘅佢仲話，今年雖然有廠商推出裸視TV，但效果麻麻哋，立體感始終唔及戴住3D眼鏡咁正！
專家過年煲碟推介
熱熱鬧鬧 齊齊睇
①《薯嘜飯局》$148（DVD）/$268（BD）
推介原因：改篇自法國電影嘅美式喜劇，角色造型搞鬼、富娛樂性，同時更表現出對人性、社會階層嘅嚴肅思考，由《非常外父揀女婿》導演，《嚟多件衰鬼上帝》及《處男40戇居居》演員助陣，成堆爆笑班底，過年睇勝在夠開心。
百無禁忌 深夜煲
④《升降凶間》$135（DVD）/$248（BD）
推介原因：由《鬼眼》、《驚兆》恐怖大師禮切沙也馬蘭監製，片長90分鐘，唔算好長！但情節一直都好緊張，最特別係故事中竟然提出咗有佛教色彩嘅因果關係；至於血腥、暴力等場面，似乎亦係鬼片必備嘅招牌菜式。
經典作品 重現藍光
⑥《嚦咕嚦咕新年財》$149（BD）
推介原因：仲記得劉華金句：「牌品好！就人品好！」由杜琪峰同韋家輝雙料炮製嘅經典電影，今年藍光重現，呢隻碟唔止採用1080p高清畫質，而且支援DolbyTrueHD7.1以及Dolby6.1，唔通麻雀聲會勁到有Surround？
體感Game Party鬥一番
新年唔出街、好多人鍾意打機！仲《Winning》？乜你唔知今年有PSMove咩?勁玩體感！PartyGame重點首選係《功夫Live》，招呼三幾老友、打番兩手，再加極富中國特色戰鬥畫面，咁先係中國新年嘛！
《功夫Live》中式打鑊金
《功夫Live》對體能要求高到你估唔到！除咗拳、腳例牌菜，佢仲加入跳、跑，轉身等唔同元素，例如你唔夠人揪，你必須變成一名跑腿，左閃右避，甚至要利用場景上嘅凹凸不平地面，不斷跳上跳落，真係攰到嘔！
值得一提係遊戲感應準繩度高，透過PS「眼仔」，更可將自己變成遊戲角色，睇得過癮，玩得仲過癮；遊戲最多對應4人混戰，更開心係PSN可下載，赤口唔出街打機更應景！
Profile
平台：PSMove
類型：動作
玩家：最多4人
售價：$93（只供PSN下載）
同場加映：扮Gaga唱歌又跳舞
玩到攰攰哋，不如坐低唱番首歌啦！唔講唔知，原來PSMove都出咗一隻又唱又跳嘅音樂體感遊戲—《SingStarDance》。
點玩法？唔使解釋喇啩！值得一讚係，遊戲除咗提供合作模式，仲可以俾你同班Friend互相挑機，如果人多啲，仲可以扮《超級巨聲》搞比賽；但要留意，由於暫時只推出英文版關係，中港台等中文歌曲全部未得有揀！
Profile
平台：PSMove
售價：$268