【本報訊】由簡樸修道到一國之官，本港慈幼會士韓大輝踏上奇妙旅程，成為首位擔任教廷高官的中國人，今日在梵蒂岡由教宗親自祝聖為總主教。作為萬民福音部秘書長，韓大輝月底將進行首個官式訪問，地點是與教廷有邦交的台灣。他嚴詞批評北京政府去年一再挑釁教廷，中梵談判短期內難以繼續；若內地不接受天主教服從教宗的原則，就不應再稱為天主教會。他又認為，曾參與非法祝聖及第八屆全國天主教代表大會的主教，應向教友道歉。
記者：張嘉雯梵蒂岡報道
祝聖儀式將在羅馬時間今早10時（香港時間今午5時）在聖伯多祿大殿舉行，罕有地由教宗本篤十六世親自主持，擢升5名主教，韓大輝排名第一。來自本港的多名神父將擔當輔祭；本港、英國及加拿大的教友已陸續抵達。
韓大輝昨日完成避靜，與來自香港的神父綵排。他將獲教宗覆手，並授予主教戒指、福音書、主教冠冕及權杖。韓大輝解釋，戒指是忠貞的標記，有「神婚」的意思，代表主教與教會結合，「亦都代表咗係宗徒傳落嚟成條鏈嘅其中一環」。福音書則代表傳揚福音；主教權杖代表牧者的權威，為羊群捨身；主教冠冕象徵光榮。教宗周一將接見韓的家人。
中梵談判短期內難繼續
這位教廷「新丁」在梵蒂岡萬民福音部大樓接受本報訪問。作為首位擔任教廷要職的中國人，韓大輝希望改善教宗與中國教會、地方教會的聯繫。中梵關係去年因非法祝聖主教及愛國會舉辦第八屆中國天主教代表大會而陷入低潮，他認為外交談判短期內難以繼續，「中國政府明知自選自聖唔啱，仲刻意去咁做，就係想令你唔舒服。陳樞機形容咁樣係打一巴掌，咁我哋係咪要畀佢打埋另外一邊呢？咁唔通佢過兩日笑笑口走返嚟同你傾，你又同佢傾喇喎，梗係唔傾啦。」
他指現時中國政府對教會事務的監管比之前更嚴厲，甚至刻意「安排」獲教廷認可的主教參與八大會議，令教廷尷尬。他形容部份主教是「投機分子」，「佢哋咁樣法，對成個教會嘅士氣造成影響，教友會好難過，教友諗住佢哋嘅主教本身合法嘅，以為佢同教宗一齊，點知佢越來越偏幫政府喎，咁你作為教友，係咪會好冇心機先」。
借可樂諷內地教會變質
他以可樂公司作比喻，暗示不能容忍情況繼續下去，「好似我哋本身係可樂公司嘅總經理，下面嘅人喺可樂入面加鹽加醋，飲落去根本唔係真正可樂，如果唔出聲，大家就慢慢以為酸可樂冇問題。如果梵蒂岡唔正式行動、唔出聲話呢種行動唔可以做，啲教友就會變質」。
韓大輝強調，地方教會與教宗共融是天主教信仰的特質，是持守2000年的傳統，「如果呢樣嘢係唔得嘅，咁唔該你呢個唔好叫做天主教，你可以話自己係基督宗派入面其中一個，但係我唔會鼓勵羊群跟隨你」。
他提醒國內主教守紀律，「人生各種選擇裏面，呢一樣佔咗好重要嘅位置，要企得穩，唔好坐住教會領導嘅位置但係唔知帶咗班羊群去邊」。他認為參與了非法祝聖和會議的主教應向教友道歉，「如果佢繼續咁樣錯，教友唔跟佢係啱嘅，因為佢已經唔係真正嘅牧人」。