"愛華頓長追唔「池」"
金錢買得到快樂、成功？唔使睇幕幕高潮嘅爭產風暴，看看球壇英國阿巴、香港羅生，話買就買，想做就做，為球壇激起波瀾製造泡沬話題不知幾過癮。唔需要好似美式隊際運動設薪酬上限，玩大咗仲要交豪華稅，換人又要加送選秀權講平衡，煩到爆；所以車仔爭霸仲有希望，博紅軍爭入前四仲有水位走，南華夢想稱王亞洲，得唔得，未知，但連亞洲超級球會挑戰盃都不入決賽，係咪仲要再加碼擴軍？
樂觀睇，隊波有問題，去到季中，仲有得執；好似冇乜添兵嘅愛華頓，上半季成為和波專家，排緊尾6，但班波人腳真係唔差；上仗迎戰阿仙奴雖被反勝，但全場不惜氣力緊纏對手各主將，打了大半場好波，只因後防兩次失誤反輸，其中費蘭尼拍阿迪達中場幾有力量，只要澳洲射手卡希爾平平安安從卡塔爾打完亞洲盃回來，呢班打仔波，輪唔到佢哋降班啩？今天主場對黑池，賠率就冇乜肉食，但愛隊黑池正處低潮，1月又添新兵需磨合，只攻不守，更啱愛華頓打快速突擊，黑池或會再大敗一場。
"朗尼回勇餓虎擒「狼」"
曼城3戰不勝，文帥要求班兵改善作戰心態，操練勤力啲；呢個世界冇話有錢人就高尚啲，地產商發到豬頭就識發財立品；超高薪球員仲要老細叫畀心機打好份工，剛加人工至75,000鎊周薪嘅法國足球先生、阿仙奴首席射手拿斯尼，同曼城超過20萬鎊人工嘅耶耶托尼同泰維斯，大家點比較？朗尼經歷半季低潮，20幾萬鎊周薪，終於喺周中射入閃電靚波，嚟料咯，最重要係鎂光燈唔再照落佢身上，家去晒啲剛轉飯鑊嘅名氣射手身上，壓力大減，低調多月對回應零批評終換來回報；曼聯今季未敗，有運、守穩、貝碧勇猛及雙斯傑斯史高斯仲頂得住佔好大因素，家連朗尼都fit番，咁就更加不得了咯，下周中打國際賽，今晚英超尾場對狼隊，唔使勒住踢，博贏[-1]兼開1:3，1:4！
"修頓入「堡」山必定瘋狂"
同時間嗰場英甲都好玩，一早講過，彼德堡全英甲最瘋，費Sir嗰仔教番，周中大炒錫周三5:3，不過今晚迎戰級數超英甲嘅修咸頓，正牌莊家將客W㩒到得1.95倍，就知彼德堡唔易打叠大炒，兩隊皆鋒強，今場倒轉買越爬越高嘅修頓單W兼3:1，4:2，入球「大」應穩，但嫌冇肉食。
"拜仁兔年繼續興「隆」"
非英國波，拜仁作客科隆有得大炒，班波又係下半季會好過上半季，洛賓場上叉梅拿頸有火，總好過班曼城以泰仔為首嘅少爺兵，小注翻冧上周作客贏3:1波膽，繼續上揚，博追近啲「1哥」多蒙特。
"華倫西亞步步「高」陞"
除咗黑池，另一升班馬靴高斯呢排唔係好對辦，佢哋唔係薪高錢聚腳，相反係糧期唔準，冇飯開鬥志散；聽日作客主場特勁嘅華倫西亞，後者主W1.4倍，肯定好買過同日英超紅車大戰，策略上應博[-1]同2:0，3:1。
蘋果波神
語錄：新正頭周末波，逢下周中無球會波踢，揀啲正路嘅熱門嚟買，望佢哋唔留力數番場。